VI Dúniejúzilik kóshpendiler oiyndarynda el namysyn qorǵap, júldeli oralǵan Almaty oblysynyń sportshylary marapattaldy. Qyrǵyzstanda ótken halyqaralyq dodada baby men baǵy qatar janǵan júldegerlerge Almaty oblysynyń ákimi Shyńǵys Árinov alǵys aityp, iltipat bildirdi, dep habarlaidy dalanews.kz.
“Kóshpendiler oiyndary – halqymyzdyń ulttyq bolmysyn, salt-dástúrin, at ústindegi ónerin álemge tanytatyn asa mańyzdy halyqaralyq jarys. Álemniń 100-den astam elinen kil myqtylar qatysqan dúbirli dodada ulttyq qurama jalpykomandalyq esepte birinshi orynǵa ie boldy. Bul – elimiz úshin úlken maqtanysh. Biz úshin taǵy bir erekshe qýanysh – el quramasynyń sapynda Almaty oblysy atynan óner kórsetken sportshylardyń júldeli oryndarǵa ie bolýy. Bul rette sportshylarymyzdyń jeńisine jol ashqan bapkerlerdiń de eńbegin erekshe atap ótkim keledi. Óńirde ulttyq sportty damytýǵa, balalar men jasóspirimder arasynan sport rezervin qalyptastyrýǵa erekshe basymdyq berilip keledi. Sońǵy jyldary ulttyq sportqa bet burǵan jastardyń qatary aitarlyqtai artty. Aldaǵy ýaqytta ulttyq sportty keńinen dáripteýge, ony buqaralyq sipatqa jetkizýge, jas talanttardy iriktep, myqty sport rezervin qalyptastyrýǵa jáne el abyroiyn asqaqtatatyn sańlaqtarǵa jan-jaqty qoldaý kórsetýge basymdyq beremiz. Ulttyq sporttyń órkendeýi zamanaýi ári qoljetimdi infraqurylymǵa da tikelei bailanysty, – dedi Shyńǵys Sairanuly.
Sondai-aq sport nysandaryn salý men jańǵyrtý jáne árbir turǵynnyń sportpen shuǵyldanýyna qolaily orta qalyptastyrý baǵytyndaǵy jumystar júieli túrde jalǵasatynyn tilge tiek etti.
Aimaq basshysy sanaýly kúnderden soń jalaýy jelbireitin HH Aziia oiyndaryna Qazaqstan quramasy sapynda Almaty oblysynyń 24 ókili sporttyń 13 túrinen baq synaitynyn aityp, barsha turǵyndardy osy bairaqty básekege qatysatyn jerlesterimizge qoldaý kórsetýge shaqyrdy.
Búgingi is-shara barysynda «Alataý» federatsiiasynyń prezidenti Sábit Qasenov, kókpardan VI dúniejúzilik kóshpendiler oiyndarynyń tóreshisi Eldos Tilebaldiev jáne alaman báigeden, kókpardan, kókbóriden júldeli oryndarǵa ie bolǵan sportshylarǵa Prezidentiń “Alǵys haty” tabystaldy. Ózge sportshylar men bapkerler de oblys ákiminiń “Qurmet gramotasy” jáne “Alǵys hatpen” marapattaldy.
Dúbirli dodada kók bairaqty jelbiretip, jeńispen oralǵan sportshylar ózderin elep-eskergen Memleket basshysy men oblys ákimine alǵys bildirdi.
