Qaraǵandyda Ońtústik-Shyǵys pen Kógildir toǵandar yqshamaýdandarynyń aralyǵynda jańa qalalyq aýdan qalyptasyp keledi. Munda turǵyn úilermen qatar áleýmettik, sporttyq jáne kólik infraqurylymy damyp, aýmaǵy shamamen 200 gektardy quraityn ekopark qurylyp jatyr, dep habarlaidy dalanews.kz.
Qazirdiń ózinde jańa aýdan aýmaǵynda 26 kópqabatty úi boi kóterdi. Aldaǵy ýaqytta munda 55-ke deiin turǵyn úi keshenin salý josparlanǵan. Jańa nysandar 7 myńnan astam páterdi paidalanýǵa berýge múmkindik beredi.
Budan bólek, bes mektep, jeti balabaqsha jáne aýrýhana keshenin salý kózdelgen.
Jobanyń mańyzdy baǵyttarynyń biri – sport infraqurylymyn qalyptastyrý. Sport klasterine 74 gektar aýmaq bólingen. Munda jalpy sany toǵyz nysan ornalasady. Qazirdiń ózinde «Shahter» fýtbol akademiiasynyń qurylysy bastaldy. Nysandy Freedom Holding Corp Qaraǵandy oblysynyń ákimdigimen jasalǵan memorandým aiasynda salyp jatyr.
Klaster aýmaǵynda ÝEFA-nyń tórtinshi sanat talaptaryna sai keletin stadion da boi kóteredi.
Sonymen qatar sport klasteriniń quramyna onnan astam olimpiadalyq sport túrine arnalǵan ámbebap sport arenasy, jeńil atletika maneji jáne uzyndyǵy 400 metrlik júgirý joly, eki hokkei korty men úsh oiyn zaly bar muz arenasy kiredi.
Munda sport mektebi, internat jáne kolledj de ornalasady. Klasterde bir mezgilde 500-den astam sportshy bilim alyp, jattyǵyp, tura alady.
Jobanyń taǵy bir aýqymdy bóligi – jasyl aimaq.
Shamamen 200 gektar aýmaqta ekopark jasaqtalyp jatyr.
Salystyrý úshin aitar bolsaq, Qaraǵandynyń Ortalyq parkiniń aýmaǵy shamamen 50 gektar.
Búginde munda 4 myńǵa jýyq aǵash otyrǵyzyldy. Jas kóshetterdi sýarý úshin tamshylatyp sýarý júiesi ornatylǵan. Kógaldandyrý jumystary aldaǵy ýaqytta da jalǵasady.
— Jańa aýdan úshin turǵyn úi qurylysynyń aýqymdy jasyl aimaqpen úilesim tabýynyń mańyzy zor. Aldaǵy úsh-bes jylda bul aýmaq tolyqqandy ekologiialyq keńistikke ainalady, – dedi Qaraǵandy qalasynyń ákimi Meiram Kojýhov.
Kólik infraqurylymyn damytýǵa da basymdyq berilip otyr. Qazir Ońtústik-Shyǵys pen Maiqudyqty jalǵaityn, uzyndyǵy shamamen 6 shaqyrym bolatyn jańa tórt jolaqty magistraldiń qurylysy bastaldy. Jol boiyna jaryqtandyrý jelisi tartylyp, trotýarlar, avtoturaqtar men velojoldar qarastyrylady.
Jańa magistral qalanyń eki iri turǵyn aýdany arasyndaǵy kólik qatynasyn jaqsartyp, olardyń arasyndaǵy bailanysty kúsheitedi. Maiqudyqta shamamen 176 myń adam tursa, Ońtústik-Shyǵystaǵy turǵyndar sany 120 myńǵa jýyqtaidy.
— Jańa magistral eki aýdan arasyndaǵy bailanysty nyǵaityp qana qoimai, oǵan irgeles aýmaqtardyń damýyna tyń serpin beredi, – dedi Meiram Kojýhov.
Qosymsha bilim berý infraqurylymy da keńeiip keledi. Maiqudyqta eki korpýstan turatyn Oqýshylar saraiy salynyp jatyr. Onyń bir korpýsynda robototehnikany qosa alǵanda, tehnikalyq baǵyttaǵy úiirmeler, ekinshisinde sport sektsiialary ornalasady.
Ońtústik-Shyǵysta, Baiken Áshimov kóshesi aýdanynda taǵy bir jańa qoǵamdyq keńistik ashyldy. Onyń aýmaǵy 50 myń sharshy metrden asady. Munda jaryqtandyrý júiesi ornatylyp, jańbyr sýyn aǵyzatyn júie jasaldy jáne asfalt tóseldi.
