Sońǵy ýaqytta áleýmettik jeliler men onlaın-habarlandyrý platformalarynda eń tómengi jetkiliktilik sheginen (TJSH) asatyn zeınetaqy jınaqtaryn sheshý boıynsha deldaldyq qyzmetter týraly usynystar qarasy kóbeıgen, árıne aqysyn tólegen jaǵdaıda. Osyǵan qatysty "BJZQ" AQ el azamattaryna alaıaqtar qarmaǵyna ilinip qalmaýdy eskertedi, dep jazady Dalanews.kz.
"BJZQ" AQ óz salymshylary men alýshylaryna mynany eskertedi:
"Zeınetaqy jınaqtaryn alý Qazaqstan Respýblıkasynyń Áleýmettik kodeksinde qatań belgilengen jaǵdaılarda ǵana múmkin. Eń aldymen, bul zeınet jasyna tolý, 1 nemese 2 toptaǵy merzimsiz múgedektik, shet elge turaqty turýǵa ketý, muragerlik".
Zeınetaqy jınaqtaryn turǵyn úı jaǵdaılaryn jaqsartýǵa jáne/nemese emdelýge zańnamamen belgilengen sharttar saqtalǵan jaǵdaıda, tómendegi azamattardyń sanaty paıdalana alady:
- eń tómengi jetkiliktilik sheginen asatyn jınaqtary bar salymshylar (TJSH-dan asatyn soma sheginde);
- zeınetaqysy joǵalǵan tabystyń (buryn alynǵan jalaqysynyń) keminde 40% quraıtyn zeınetkerler - olar shotta qalǵan jınaqtarynyń 50% deıin paıdalana alady;
- eńbek sińirgen jyldary boıynsha zeınetkerler (jınaqtarynyń 100% deıin paıdalana alady);
- zeınetaqy anýıteti shartyn jasasqan salymshylar (jınaqtarynyń 100% deıin paıdalana alady).
Zeınetaqy jınaqtaryn turǵyn úıge nemese emdelý syndy maqsatty paıdalaný tek ýákiletti operatorlar – ekinshi deńgeıdegi bankter arqyly múmkin bolady. Tıisinshe, deldaldyq qyzmetter qajet emes. Bul rette BJZQ eshqandaı aqy almaıdy.
"Kúmándi áreketke qatysýǵa kelise otyryp, siz aqshańyzdy joǵaltý qaýipin týdyryp qana qoımaı, bolashaqta basqa alaıaqtyq áreketter úshin paıdalanylýy múmkin jeke derekterińizdiń saqtalýyna da qaýip tóndiresiz", - deıdi qordaǵylar.
BJZQ óz salymshylary men alýshylaryna mundaı usynystardy elemeýge, tek resmı kózderden aqparat alýǵa jáne quqyqtyq turǵydan qorǵalǵan salada ǵana áreket etýge qatań keńes beredi.
