Seisenbi kúni Túrkiiada islam dinin ýaǵyzdaýshy Fethýllah Giýlenmen bailanysy bar delingen 24 tele-jáne radiostantsiialardyń litsenziialary qaitarylyp alyndy. Ankara Giýlendi 16 shildeniń túninde bolǵan sátsiz memlekettik tóńkeris áreketine dem berýshi dep aiyptaidy.
Giýlendi qoldaýshylarǵa qarsy kampaniiada 34 jýrnalist press-karttarynan aiyryldy, bilim ministrliginiń 15 myń qyzmetkeri, ýniversitettiń myń jarymnan astam dekany, dini basqarmanyń 490 jumysshysy, premer-ministr apparatynyń 257 jáne barlaý qyzmetiniń 100 qyzmetkeri jumystarynan shyǵaryldy.
Sońǵy kúnderi 35 myń armiia ofitseri, politsiia, sot jáne memlekettik qyzmet ókilderiniń birazy ustalyp, qalǵandary qyzmetterinen shettetildi. Olardyń bári memleketke qarsy qastandyq áreketine qatysy bar dep aiyptalady.
Seisenbi kúni Túrkiia biligi AQSh-ta turatyn Giýlendi keri qaitaryp, qamaýǵa alýdy talap etti. Túrik premer-ministri Binali Iyldyrym AQSh biligine elektrondy júiemen ol týraly tolyq málimet jibergenin málimdedi. Giýlen bolsa, ózine taǵylǵan barlyq aiyptardy joqqa shyǵarady, tipten eger AQSh soty ony keri qaitarýǵa sheshim shyǵarsa, oǵan da daiyn ekenin jetkizdi. Munyń aldynda Vashington Ankaradan Giýlenniń tóńkeris áreketine qatysy bary dáleldenetin jan-jaqty ári naqty dáiekter usynýyn ótingen.
Túrkiianyń batystaǵy áriptesteri, sonymen birge BUU Ankara biliginen zań aiasynda jumys isteýge shaqyryp, 2004 jyly engizilgen ólim jazasyna moratoriidi alyp tastaý múmkindigine alańdaýshylyqtaryn bildirdi. Túrkiia prezidenti Rejep Taiyp Erdoǵan ólim jazasy tek memlekettik tóńkeristi uiymdastyrýshylarǵa ǵana qatysty bolýy múmkin dedi.
