Tanymal prodiýser Baian Alagózova aktrisa Merýert Ótekeshevaǵa ómir boiy ai saiyn 1 million teńge kóleminde qarjylai qoldaý kórsetetinin málimdegen edi. Aktrisa tosyn syilyqqa qatysty pikir bildirdi, dep habarlaidy Dalanews.kz.
24KZ aktrisamen tildesip, mán-jaidy suraǵan. Ańyz aktrisa bul jańalyqty áleýmettik jeliden estip, tańǵalǵanyn jasyrmaǵan.
Onyń aitýynsha, Baian Alagózovamen osy ýaqytqa deiin betpe-bet kezdesip, sóilespegen.
"Bul jańalyq men úshin kútpegen jerden boldy. Baianmen ómirde kezdespegen ekenbiz, jeke tanystyǵymyz joq. Biraq onyń jumystaryn syrttai baqylap, talantty prodiýser retinde qurmetteimin", - dedi Merýert Ótekesheva.
Jurtty mazalaǵan saýaldyń biri - aty ańyzǵa ainalǵan "Qyz Jibek" filmindegi kamzoldyń Baian Alagózovaǵa qalai jetkeni.
"Film túsiriliminen keiin ol kamzoldy kórmegenmin. Kinostýdiia jabylǵan kezde kostiýmderdiń biri kostiýmerdiń qolynda ketken bolýy múmkin. Kimniń qolynda bolǵanynan beihabarmyn. Degenmen sol jádigerdi 50 jyl boiy kózdiń qarashyǵyndai saqtap, búldirmei búginge jetkizgeni úshin alǵysymdy aitamyn. Kamzoldyń Baianǵa berilgenine renjimeimin. Ol da óner adamy, qadirin biledi. Baian ony báribir murajaiǵa tapsyratynyn aitty, bul sheshimine rizamyn" - deidi aktrisa.
Sonymen qatar, Merýert Ótekesheva Baian Alagózovanyń bul qadamyn ónerge degen qurmet dep túsinetinin jetkizdi.
"Quman ekeýimiz ómir boiy halyqqa eńbek ettik. Bizde biznes bolǵan joq, bir jalaqyǵa qarap jumys istedik. Sondyqtan Baian bizdiń jaǵdaiymyzdy túsinip, osyndai izgi niet tanytyp otyr dep oilaimyn", - dedi aktrisa.
Prodiýserdiń usynǵan syi-siiapatyn qabyldaý máselesine kelgende, Merýert Ótekesheva áli naqty sheshimin aitpaǵan. Sebebi eki tarap áli kezdesip, júzbe-júz sóilespegen.
Eske salaiyq, buǵan deiin Merýert Ótekesheva ómiriniń sońyna deiin kásipkerden arnaiy zeinetaqy alatynyn jazdyq.
