Búgin Abai ýniversitetinde talapkerlerge arnalǵan «Ashyq esik kúni» aiasyndaǵy aptalyq óz máresine jetti. 23-29 sáýir aralyǵynda ótken aýqymdy is-sharaǵa Almaty qalasy men oblys aýdandarynan myńǵa jýyq talapker qatysyp, oqý ornynyń tynys-tirshiligimen tanysty, dep habarlaidy Dalanews.kz.
Aptalyq barysynda ýniversitettiń ár fakýltetinde arnaiy tanystyrylymdar uiymdastyrylyp, bilim berý baǵdarlamalary men múmkindikteri jan-jaqty nasihattaldy. Qorytyndy jiynda fakýltetter jármeńkesi ótip, talapkerler ózderin qyzyqtyrǵan mamandyqtar boiynsha tolyq aqparat aldy.
Saltanatty ashylý rásiminde ýniversitettiń Akademiialyq qyzmet jónindegi prorektory Baný Narbekova talapkerlerge jyly lebizin bildirip, ashyq esik kúnine qatysýshylardy quttyqtady. Prorektor óz sózinde qazirgi tańda 20 myńnan astam stýdent qara shańyraqta bilim alyp jatqanyn, sondai-aq oqý ornynyń halyqaralyq reitingte aldyńǵy orynnan kórinip júrgenin atap ótti. Baný Muhataiqyzy talapkerlerdiń Abai ýniversitetin tańdaýǵa niet bildiretinine senim artty. Bilim berý baǵdarlamalarynyń sapaly ári zamanaýi talaptarǵa sai, stýdentter úshin mol múmkindikter qarastyrylǵanyn jetkizdi. Halyqaralyq bailanystardyń nyǵaiyp, stýdentterge jańa bilim men tájiribe jinaýǵa jol ashyq ekenin tilge tiek etti.
Is-sharaǵa arnaiy qatysqan Ǵylym jáne joǵary bilim ministriniń keńesshisi Rýslan Toqtarbekuly da talapkerlerge sáttilik tilep, bilim alýdyń mańyzdylyǵyna toqtaldy. Kezdesý barysynda UT sarapshysy Farhat Sultabaev talapkerlerge ulttyq biryńǵai testileýdi tapsyrýdyń tiimdi ádisterimen bólisti.
– Testileýdi sátti tapsyrý úshin úsh ainalym strategiiasyn qoldanýǵa keńes beremin. Aldymen eń ońai suraqtardan bastaý kerek. Keiin testti taldap, qatelermen jumys júrgizý mańyzdy. Sońynda ár testke analitikalyq saraptama jasap, qaita-qaita oryndaý arqyly mashyqtaný qajet, – dedi sarapshy.
Jiyn barysynda Almaty oblystyq bilim berýdi damytý oqý-ádistemelik ortalyǵynyń direktory Gúljahan Imanhatova bul is-sharanyń talapkerler úshin mańyzy zor ekenin alǵa tartty. Sondai-aq ýniversitet túlegi, Qazaqstannyń halyq ártisi Ramazan Stamǵaziev jas túlekterge aq jol tilep, «Gákký» halyq ánin oryndap, kórermenniń ystyq yqylasyna bólendi.
Is-sharada Jaratylystaný jáne geografiia fakýltetiniń 3-kýrs stýdentteri «Himiia – tańǵajaiyp álem» atty eksperimenttik shoý usynyp, ǵylymnyń qyzyqty qyrlaryn kórsetti. Al Dene shynyqtyrý kafedrasynyń stýdentteri djiý-djitsý ónerinen sheberligin pash etti. Sonymen qatar Abai ýniversitetiniń bilim alýshylary Nurshapaǵat Sáýlet pen Ómirzaq Ámir oryndaǵan «Abaiymnan tapqanym» áni keshtiń kórkin qyzdyra tústi.
Is-shara sońynda talapkerler arasynda viktorinalyq oiyn uiymdastyrylyp, belsendi qatysýshylarǵa arnaiy imidjdik syilyqtar tabystaldy. Bir aptaǵa sozylǵan «Ashyq esik kúni» talapkerlerge ýniversitet ómirimen jaqynyraq tanysyp, bolashaq mamandyqtaryn tańdaýǵa úlken múmkindik syilady.
Aita keteiik, Abai atyndaǵy QazUPÝ – otandyq bilim-ǵylymnyń qara shańyraǵy, Orta Aziiadaǵy eń úzdik pedagogikalyq joǵary oqý orny. Ǵasyrǵa jýyq tarihynda 250 myńǵa jýyq joǵary bilimdi kadrlar daiyndap, otandyq bilim berý salasynyń damýyna eleýli úles qosyp keledi. Ýniversitet pedagogika salasynda ǵana emes menedjment, quqyq jáne zań baǵyttary boiynsha mamandar daiarlaidy.
