Parlament Májilisiniń depýtaty Nartaı Aralbaı turǵyn úı men halyq qarajatynyń jumsalýyna qatysty ashyqtyq máselesin kóterdi, dep habarlaıdy Dala News.

Onyń aıtýynsha, azamattar óz qarjysynyń qalaı jumsalyp jatqanyn túsinbeıdi, al bul senimsizdikke ákelip otyr.

«Adamdardyń úısiz júrip, óz qarajatyn paıdalanýǵa múmkindigi bolmaı otyr. Qansha aqsha jınalyp jatyr, qaıda jumsalyp jatyr – naqty bilmeımiz. Ashyqtyq joq, baqylaý joq. Aqsha túsip jatqanyn kóremiz, biraq onyń qaıda ketkenin eshkim túsindirmeıdi», – dedi depýtat.

Nartaı Aralbaı bul másele tek turǵyn úımen shektelmeıtinin, jalpy qarjynyń tıimdi ıgerilýine qatysty ekenin atap ótti. Onyń pikirinshe, halyqtyń qarajatyna baılanysty barlyq prosester ashyq ári túsinikti bolýy tıis.

«Halyq óz aqshasynyń qozǵalysyn baqylap otyrýy kerek. Ár teńgeniń qaıda ketkeni kórinip turýy tıis. Qazir ondaı múmkindik joq. Sol sebepti adamdarda kúmán kóp, senim az», – dedi ol.

Depýtat bul baǵytta ashyqtyqty arttyratyn naqty mehanızmder qajet ekenin aıtty.