Májiliste aliment tólemderin qamtamasyz etý úshin arnaiy memlekettik qor qurý usynyldy. Depýtat Magerram Magerramovtyń sózinshe, bul zańsyz alynǵan aktivterdi qaitarýdan túsken qarajat esebinen qalyptasady, dep habarlaidy Dalanews.kz.
Plenarlyq otyrysta atqarýshylyq is júrgizýge qatysty túzetýlerdi talqylaý kezinde depýtat aliment boiynsha bereshek kólemi keiingi jyldary kúrt óskenin aitty. Aitýynsha, sońǵy 10 jylda qaryz kólemi toǵyz ese artqan.
"2016 jyly aliment qory qajet ekenin alǵash kótergen kezde bereshek 2 mlrd teńge edi. Qazir Ádilet ministrliginiń málimetinshe, bul soma 18 mlrd teńgege jetti. Onyń ózi – úsh aidan astam tólenbegen qaryzdar ǵana. Búginde Qazaqstanda 300 myńnan astam bala alimentke muqtaj. Olardyń arasynda múmkindigi shekteýli balalar da bar", – dedi depýtat.
Osyǵan bailanysty ol úkimetten, atap aitqanda Ádilet ministrliginen, salyqtyq emes túsimder esebinen arnaiy qor quryp, keiin bul qarajatty boryshkerlerden óndirip alý tetigin qarastyrýdy surady.
Óz kezeginde ádilet vitse-ministri Bekbolat Moldabekov atalǵan másele áli de pysyqtalyp jatqanyn jetkizdi. Onyń aitýynsha, mundai sheshim biýdjetke tikelei áser etetindikten Qarjy ministrligi men Ulttyq ekonomika ministrligimen kelisýdi qajet etedi.
Aita keteiik, aliment qory týraly bastama depýtattar tarapynan 2024 jyldan beri kóterilip keledi. Buǵan deiin úkimet bul usynysty qoldamaǵan. Alaida qaryz kóleminiń ósýine bailanysty endi atalǵan máseleni qaita qaraý josparlanyp otyr.
