Dýshanbedegi aýdandyq sot tájik salafıtshileriniń kósemi Muhammadı Rahmatýllony segiz jylǵa túrmege otyrǵyzdy. Ozodı radıosynyń habarlaýynsha, úkim ótken aptanyń sońynda shyǵarylǵan. Rahmatýllo ekstremıstik qaýymdastyq qurdy degen aıyppen sottaldy.
Sottalýshynyń advokaty Tolıbı Sangın sot úkimimen kelispeıtinin, sottyń joǵarǵy satysyna shaǵymdanatyn málimdedi.
Rýdakı aýdanynyń 43 jastaǵy turǵyny Muhammalı Rahmatýllo bıyl aqpan aıynda qamaýǵa alyndy. 2011 jyly ol Islamabadtaǵy Halyqaralyq ıslam ýnıversıtetiniń sharıǵat fakúltetin aıaqtap, elge oraldy.
Osydan on jyl buryn Tájikstanda «Salafıa» qozǵalysynyń yqpaly kúsheıip turǵan kezde, Rahmatýllo eldegi dástúrli din ókilderimen pikir-talastarda salafıtshilerdiń bas nasıhatshysy boldy. Ol ózin tájik salafıtshileriniń kósemi retinde tanystyrdy.
2009 jyly Tájikstanda «Salafıa» dinı qozǵalysyna tyıym salynǵan soń, Rahmatýllo kópshilik aldyna kóp shyqpaı ketti. Ótken jyly qańtarda onyń ustalǵany týraly aqparat taraǵan ýaqytta, eldiń quqyqqorǵaý organdary bul málimetti rastamaǵan edi. Eldiń ishki ister mınıstri Ramazon Rahımzoda ótken jyly qozǵalystyń birqatar belsendisi qamaýǵa alynǵanyn málimdedi, biraq olardyń arasynda Rahmatýllonyń bar-joǵyn anyqtap aıtpady.
