Muǵalimder endi esepti qaǵazǵa shyǵaryp qaita tapsyrýdan bosatylýy múmkin, dep habarlaidy Dalanews.kz.
Eger esep elektrondy formatta tapsyrylsa, ony qosymsha qaǵaz nusqasynda ótkizýdi talap etý toqtatylmaq. Bul týraly Májilistiń jalpy otyrysynda bilim salasyna qatysty túzetýlerdi talqylaý kezinde depýtat Ashat Aimaǵambetov aitty.
Onyń sózinshe, qazirgi tańda ustazdardan bir esepti qatarynan eki formatta – elektrondy jáne qaǵaz túrinde tapsyrý jii suralady. Depýtat muny ýaqytty zaia ketiretin jáne negizsiz talap dep baǵalady.
«Muǵalimder bir esepti eki ret tapsyrýǵa májbúr. Aldymen aqparattyq júiege júkteidi, keiin qaǵazǵa basyp shyǵaryp, bólek ótkizedi. Esep júiede tur, qabyldanǵan, tekserilgen. Onda ekinshi nusqasyn suraýdyń ne qajeti bar? Buǵan eshkim naqty jaýap bere almaidy. Bul – jai ǵana qalyptasqan ádet», – dedi Aimaǵambetov.
