Keńes barysynda memlekettik organdardy kóshirý protsesi talqylandy, sondai-aq Túrkistannyń jáne jalpy oblystyń áleýmettik-ekonomikalyq jáne mádeni damý prespektivalary qaraldy.
Keńesti ashqan Baqytjan Saǵyntaev 19 maýsym kúni Memleket basshysy Túrkistan oblysyn qurý týraly Jarlyqqa qol qoiǵanyn eske saldy, osylaisha, Túrkistan oblys ortalyǵy atandy. Jarlyqty iske asyrý úshin QR Premer-Ministriniń birinshi orynbasary A. Maminniń tóraǵalyǵymen Túrkistan oblysyn damytý prespektivalary jónindegi Komissiia quryldy.
Oblysta memlekettik organdar men uiymdardyń úzdiksiz ári tiimdi jumysyn qamtamasyz etý boiynsha negizgi is-qimyldardy qamtityn tiisti Jol kartasy bekitildi.
B. Saǵyntaev sonymen qatar QR Prezidentiniń tapsyrmasyna sáikes, qalany damytýdyń bas josparynyń tujyrymdamasyn damytý boiynsha jumystar júrgizilip jatqanyn atap ótti. Memleket basshysy qoiyp otyrǵan basty maqsat – qysqa merzim ishinde jańa ǵimarattar qurylysyn bastaý. Premer-Ministr oblysta qurylys jumystary qarqyndy júrgizilýi tiis ekenin basa aitty.
Óńirdi damytý boiynsha Prezident qoiǵan mindetterdi iske asyrý úshin qajetti qarajat tolyqqandy bólinetin bolady.
Kóshirý barysy týraly oblys ákimi Janseiit Túimebaev baiandady. Baiandalǵan aqparatqa sáikes, barlyq jergilikti atqarýshy organdar memlekettik tirkeýden ótken. Olardy ornalastyrý úshin Túrkistanda jalpy aýmaǵy 11 680 m2 bolatyn 12 ǵimarat bólingen. Birinshi kezeńde qyzmetkerlerdiń 70% kóshirildi. 27 aýmaqtyq organ úshin 16 ǵimarat bólindi. Qazir 14 vedomstvonyń ókilderi qalaǵa ornalastyrylyp, óz jumystaryn bastaǵan.
Oblys ákimi kóship jatqan memlekettik qyzmetkerlerdi baspanamen qamtamasyz etý máselesine jan-jaqty toqtaldy. Qazir qyzmetkerlerge 67 jekemenshik páter jaldaýǵa usynylǵan. Orta eseppen, mundai baspana aiyna 50-80 000 teńge bolady. Sonymen qatar, Túrkistanda ýaqytsha ornalastyrý úshin jataqhanalarda 305 oryn, 14 qonaq úi, Kentaýda – 275 oryndyq jataqhana men 7 turǵyn úi ázirlengen. Túrkistanda 1200 páterlik 20 kópqabatty úidiń, Kentaýda 420 páterlik 7 úidiń qurylysy júrip jatyr. Nysandar qurylysyn aiaqtaý jáne paidalanýǵa berý 2019 jyly josparlanǵan.
Al Prezidenttiń bes áleýmettik bastamasyn iske asyrý aiasynda «7-20-25» baǵdarlamasyn júzege asyrý úshin Áleýmettik-kásipkerlik korporatsiia 360 páter bolatyn 6 kópqabatty úidiń qurylysyn bastady.
Biýdjetke keler bolsaq, 2018-2019 jyldarǵa arnalǵan oblystyq biýdjettiń josparlanǵan kólemi qaita qaralyp, bekitildi. Osy jyldaǵy oblystyq biýdjet 621,6 mlrd teńgeni qurady, al Shymkenttiń biýdjetin bólgennen keiin oblystyq biýdjet 552,5 mlrd teńgege baǵalandy. Ulttyq ekonomika jáne qarjy ministrlikterine Shymkent qalasynyń aldaǵy eki jyldyń shyǵyndaryn jabýǵa ótinim berildi. Shymkentte ornalasqan oblystyq nysandardy (167 óńirlik mekeme) qalalyq menshikke berý jumystary júrgizilýde. Qala teńgerimine 29,5 mlrd tg aktivimen 55 kásiporyn berildi.
J. Túimebaev oblysty jáne Túrkistandy damytý týraly baiandai otyryp, birinshi kezekti sharalar anyqtalǵanyn, Túrkistan oblysyn 2024 jylǵa deiin áleýmettik-ekonomikalyq damytýdyń bas josparynyń jobasy ázirlengenin aitty. Keshendi jospar 188 sharadan turady. Bes jyl ishindegi qajetti qarajat kólemi – 1,3 trln teńge.
– Týristerdi tartatyn basty ortalyq – H. A. Iassaýi kesenesi Mádeniet jáne sport ministrligine tiesili. Biz ministrlikpen birlesip Túrkiia tájiribesi boiynsha kesene mańynan týristik oryn qurý maqsatynda kásiporyn qurýdy josparlar otyrmyz, – dep ákim, Túrkistannyń joǵary týristik áleýetin atap ótti. Tek ótken jyldyń ózinde qalaǵa millionnan astam týrist keldi.
Aýmaqtyq atqarýshy organdardy kóshirý, óńirdegi qazirgi jaǵdai jáne óńirdi damytýdyń qolda bar perspektivalary týraly beiindi ministrlikterdiń ókilderi baiandady.
Ulttyq ekonomika ministri T. Súleimenov, Bilim jáne ǵylym ministri E. Saǵadiev, Densaýlyq saqtaý ministri E. Birtanov, Aýyl sharýashylyǵy vitse-ministri E. Nysanbaev, Investitsiialar jáne damý vitse-ministri Q. Óskenbaev, Energetika vitse-ministri M. Myrzaǵaliev, Mádeniet jáne sport vitse-ministri E. Qojaǵapanov, Eńbek jáne halyqty áleýmettik qorǵaý vitse-ministri S. Jaqypova, Ishki ister vitse-ministri B. Bisenqulov, sondai-aq «Samuryq-Qazyna» UÁQ» AQ basqarma tóraǵasynyń orynbasary A. Aidarbaev oryn aýystyrý barysy týraly pikir bildirdi.
Óz kezeginde Premer-Ministrdiń birinshi orynbasary A. Mamin búginde sáýletshiler qalany infraqurylymdyq jáne innovatsiialyq damytýdyń 22 jobasyn ázirlegennin atap ótti. Qyrkúiek aiynyń sońyna deiin Bas jospardyń tujyrymdamasyn bekitý týraly sheshim qabyldanady. Bekitýden keiin, Bas jospardy daiyndaýǵa baiqaý jariialanady, ol eki kezeńnen turady Birinshisi 2035 jylǵa deiingi aralyqty qamtysa, ekinshisi 2050 jylǵa deiingi ýaqytty qamtidy.
Keńes barysynda óńirdi damytýdyń bas josparynyń tujyrymdamasyn ázirleý jóninde «Qazqalaqurylys» jobalyq institýtynyń bas sáýletshisi T. Eráliev aityp berdi. Ailyq merzimde sarapshylar toby barlyq baiqaý jumystaryn jinap, qaraýǵa qabyldady.
QR Premer-Ministriniń baspasóz qyzmeti
