Qazaqstannyń Bas prokýratýrasy Bolat Nazarbaevtyń uly Nurbol Nazarbaevqa tiesili aktivterdi zerttep jatyr. Bul týraly Bas prokýror Berik Asylov Májilis depýtatynyń saýalyna bergen jaýabynda málimdedi, dep habarlaidy Dalanews.kz.
Eske salaiyq, biyl qyrkúiekte depýtat Rinat Zaiytov óz saýalynda sot Nurbol Nazarbaevtan 57 mlrd teńge kólemindegi aktivterdi tárkilep, memleket menshigine qaitarǵanyn aitqan edi. Sondai-aq oǵan 925 mln jáne 230,4 mln teńge kóleminde aiyppul salynǵan.
"Eń bastysy, onyń barlyq bank esepshoty buǵattaldy. Ol kompaniia tabysyna da, jeke múlkine de ielik etý quqyǵynan aiyryldy. Qoǵamda bul otbasynyń elimizdegi birqatar bazarǵa, sonyń ishinde atyshýly “Altyn Orda” naryǵyna qatysy bar degen áńgimeler jii aitylady. Sonymen birge Almaty qalasy men oblysyndaǵy zańsyz iemdenilgen jer telimderi týraly da aitylyp júr. Alaida bul nysandar tárkilengen aktivterdiń qatarynda bar-joǵy ázirge belgisiz. Sebebi bul máseleniń naqty derekteri resmi túrde jariialanǵan joq", – delingen depýtattyq saýalda.
Zaiytov Nurbol Nazarbaevqa tiesili kásiporyndar men múlikti túgendep, zańsyz alynǵan aktivterdi memleketke qaitarýdy talap etti.
Berik Asylov óz jaýabynda Nurbol Nazarbaevqa qatysty aktivter arnaiy qurylǵan aktivterdi qaitarý jónindegi ýákiletti organnyń jumysyna engizilgenin aitty.
"Aktivterdi qaitarý boiynsha júrgizilip jatqan jumys nátijeleri zańmen qorǵalatyn qupiialylyq talaptaryn eskere otyryp, buqaralyq aqparat quraldarynda jariialanyp otyrady. Suraýyńyzda kórsetilgen tulǵa da zań aiasynda atalǵan jumysqa engizildi. Alaida zańnyń 8-babynyń 3-tarmaǵyna sáikes, aktivterdi qaitarý jónindegi ýákiletti organ men komissiia músheleri alynǵan aqparattyń qupiialyǵyn qamtamasyz etýge mindetti. Siz usynǵan málimetter zańsyz iemdenilgen aktivterdi anyqtaý, buǵattaý jáne qaitarý boiynsha jumys barysynda eskeriletin bolady", – dedi Bas prokýror.
Sonymen qatar ol aktivterdi memleketke qaitarý jónindegi komissiia jalpy quny 1,3 trln teńge bolatyn aktivter boiynsha sharalar qabyldaǵanyn atap ótti. Onyń ishinde 750 mlrd teńge erikti túrde qaitarylǵan, sondai-aq 103 mlrd teńge kólemindegi múlik memleketke ótkizilgen. Qaitarylǵan aktivter esebinen 400-den astam áleýmettik nysan salý josparlanǵan, onyń 68-i qazirdiń ózinde salynyp bitti. Budan bólek, 112 mlrd teńgege jýyq aktivti qaitarý boiynsha jumystar júrip jatyr.
Al 1 qazanda Májilis depýtaty Ermurat Bapi da Nurbol Nazarbaevqa qatysty reiderlik faktilerdi málimdegen bolatyn. Ol Qaraǵandy oblysyndaǵy kásipkerdiń biznesin tartyp alý oqiǵasyn mysalǵa keltirip, osy boiynsha toqtatylǵan qylmystyq isti qaita qaraýdy talap etti.
Berik Asylovtyń aitýynsha, Almatyda DER (ekonomikalyq tergeý departamenti) kásipker Ermentaevqa tiesili TOO «PORÝS» kompaniiasyndaǵy 16% úlestiń zańsyz qaita tirkelýine qatysty tergeý júrgizgen. Biyl 22 aqpanda «qylmys quramy bolmaǵandyqtan» is toqtatylǵan. Alaida keiin kásipker usynǵan jańa dálelder eskerilip, 2025 jylǵy 9 qazanda is qaita qaraýǵa jiberildi.
