Qazaqstannyń munai óndirisi 2027 jyly 96 mln tonnamen shektelýi múmkin – HVQ

Qazaqstannyń munai óndirisi 2027 jyly 96 mln tonnamen shektelýi múmkin – HVQ
cpc.ru

Kaspii qubyr konsortsiýmyndaǵy irkilister Qazaqstannyń munai sektoryna 2027 jyly da áser etip, óndiris kólemin tejeidi. Halyqaralyq valiýta qory Qazaqstannyń kelesi jylǵa arnalǵan munai óndirý boljamyn 100 mln tonnadan 96 mln tonnaǵa deiin tómendetti, dep habarlaidy dalanews.kz.

HVQ missiiasynyń Qazaqstandaǵy basshysy Amina Lareshtiń aitýynsha, 2026 jyly munai sektorynda bolǵan irkilisterdiń saldary kelesi jyly da seziledi. Sondyqtan munai salasy 2027 jyly ekonomikalyq ósimniń negizgi qozǵaýshy kúshine ainalmaidy.

«Árine, biz 2026 jyly munai sektorynda bolǵan irkilisterdi eskerdik jáne olardyń 2027 jylǵa da áser etetinin bilemiz. Sondyqtan 2027 jyly munai sektory ósimniń negizgi lokomotivi bolmaidy dep esepteimiz», – dedi Amina Laresh Astanada ótken brifingte.

Onyń sózinshe, KTK-ǵa jasalýy múmkin jańa shabýyldar men munai sektoryndaǵy ózge de irkilister biýdjet kirisine áser etýi yqtimal. Mundai táýekelder HVQ-nyń negizgi stsenariiinde qarastyrylǵanymen, naqty boljamǵa engizilmegen.

«Biz munai sektoryndaǵy irkilisterge bailanysty táýekelderdiń bar ekenin moiyndaimyz. Bul táýekelderdi anyqtap, resmi organdarmen talqyladyq. Óitkeni munai sektoryndaǵy odan ári irkilister úkimettiń ieligindegi munai resýrstaryna áser etedi. Salyq júiesi arqyly bul biýdjet tapshylyǵyna yqpal etýi múmkin. Iá, biz muny talqyladyq. Mundai jaǵdailar bazalyq stsenarii úshin táýekel bolyp sanalady. Bazalyq stsenarii – biz eń yqtimal dep esepteitin boljam. Biraq biz mundai irkilisterdi boljap otyrǵan joqpyz. Iaǵni, olardy talqylaimyz, alaida boljamymyzǵa engizbeimiz», – dedi missiia basshysy.

HVQ boljamyna sáikes, Qazaqstan ekonomikasynyń ósimi negizinen munaiǵa qatysy joq salalar esebinen jalǵasady. 2026 jyly keiinge shegerilgen munai sektoryndaǵy keibir jumystar 2027 jylǵy óndiris qarqynyna da keri áser etedi.

HVQ-nyń Taiaý Shyǵys jáne Ortalyq Aziia elderi departamentiniń aǵa ekonomisi Din Hen Qazaqstannyń 2027 jylǵy munai óndirý boljamynyń tómendetilgenin naqtylady.

«Qazaqstan 2027 jyly 100 mln tonnaǵa jete alar edi, alaida biz stsenariige tek 96 mln tonnany engizip otyrmyz. Sebebi jóndeý jumystary júrgiziletinin eskerdik. Biraq ázirge odan da aýqymdy tómendeý táýekelderin boljamǵa engizgen joqpyz. Eger qandai da bir jaǵdai oryn alsa, stsenariidi ózgertemiz. Ázirge boljam osyndai», – dedi ol.