Bektenov otandyq óndirýshilerdi qoldaýdaǵy olqylyqtardy joiýdy tapsyrdy

Bektenov otandyq óndirýshilerdi qoldaýdaǵy olqylyqtardy joiýdy tapsyrdy
UKIMET

Premer-ministr Oljas Bektenov otandyq óndirýshilermen jasalatyn sharttardyń kólemin arttyrýdy, ofteik-kelisimsharttardy keńeitýdi jáne qazaqstandyq taýar óndirýshiler tizilimine engizý rásimin jeńildetýdi tapsyrdy, dep habarlaidy dalanews.kz.

Úkimet otyrysynda Úkimet basshysy qazaqstandyq kásiporyndar shyǵaratyn ónimge turaqty ótkizý naryǵyn qalyptastyrý qajettigin aitty. Onyń pikirinshe, uzaqmerzimdi sharttar men ofteik-kelisimsharttar óndiris kólemin ulǵaitýǵa, shikizatty tereń óńdeýge jáne jańa tehnologiialardy igerýge múmkindik beredi.

«Munda kásiporynnyń jańa ónimin uzaqmerzimdi shart negizinde ótkizýge kepildik beretin ofteik-kelisimsharttar bekitý tetigin keńinen qoldaný qajet. Bul shyǵarylatyn ónim nomenklatýrasyn ulǵaitýǵa, qazaqstandyq shikizatty tereń óńdeýge, sondai-aq quzyretterdi arttyryp, jańa tehnologiialardy igerýge múmkindik beredi», – dedi Oljas Bektenov.

Osy baǵyttaǵy jobalardy júzege asyrýda «Báiterek» investitsiialyq holdinginiń qarjylyq quraldaryn paidalaný usynyldy. Holding otandyq jáne sheteldik investorlarmen tikelei jumys júrgizip, jobalardy qoldaýǵa qatysýy tiis.

Premer-ministr Ónerkásip jáne qurylys ministrligine Qarjy ministrligimen jáne «Atameken» ulttyq kásipkerler palatasymen birlesip, jyl sońyna deiin satyp alý rásimderindegi kedergilerdi joiýdy tapsyrdy. Sondai-aq otandyq óndirýshilermen jasalatyn sharttardyń kólemin arttyrý mindeti qoiyldy.

Ónerkásip jáne Energetika ministrlikteri jer qoinaýyn paidalanýshylarmen birlesip, qazaqstandyq kásiporyndardan satyp alynatyn taýarlardyń tizbesi men kólemin aiqyndaýy kerek. Budan bólek, múddeli memlekettik organdar men kompaniialar 2027 jylǵa arnalǵan uzaqmerzimdi sharttar jáne ofteik-kelisimsharttar josparyn jyl sońyna deiin bekitýi qajet.

Bektenov Qazaqstandyq taýar óndirýshiler tiziliminiń jumysyndaǵy máselelerge de toqtaldy. Onyń aitýynsha, biyl iske qosylǵan júie arqyly 70 myńnan astam taýar pozitsiiasy boiynsha 2,7 myńǵa jýyq óndirýshiniń qyzmeti rastalǵan.

«Naqty qoldaý tetigin, sondai-aq taýarlardyń shyǵý teginiń ashyqtyǵy men shynaiylyǵyn qamtamasyz etý úshin osy jyldyń basynan bastap Qazaqstandyq taýar óndirýshilerdiń tizilimi iske qosyldy. Onyń kómegimen 70 myńnan astam taýar pozitsiiasy boiynsha 2700-ge jýyq óndirýshiniń qyzmeti rastaldy. Bul tetik qurylys salasynda, memlekettik satyp alýlarda, sondai-aq ulttyq kompaniialar men jer qoinaýyn paidalanýshylardyń satyp alýlarynda ǵana emes, jeńildikpen qarjylandyrý alý kezinde de belsendi qoldanylýy tiis edi. Sol úshin memlekettik satyp alý aiasynda tek otandyq óndirýshilerden satyp alynatyn taýarlar tizbesin keńeittik», – dedi Premer-ministr.

Alaida toǵyz aidyń qorytyndysy boiynsha jasalǵan sharttardyń kólemi ótken jyldyń sáikes kezeńimen salystyrǵanda 8%-ǵa azaiǵan. Kásipkerler tizilimdegi mártebesin rastaý rásimderiniń uzaqqa sozylatynyna shaǵymdanǵan. Budan bólek, qatty paidaly qazbalar salasyndaǵy jer qoinaýyn paidalanýshylardyń qazaqstandyq kásiporyndardan taýar satyp alý úlesi nebári 17%-dy qurap otyr.

Osyǵan bailanysty Ónerkásip jáne qurylys ministrligine múddeli memlekettik organdarmen birge tizilimdi jetildirý jáne ony memlekettik organdardyń derekqorlarymen yqpaldastyrý tapsyryldy. Bul kásiporyndardyń menshikti óndirisi bar-joǵyn onlain rejimde tekserýge múmkindik berýi tiis.

Sondai-aq Jasandy intellekt jáne tsifrlyq damý ministrligimen birlesip, úsh ai ishinde óndirýshilerdi tizilimge engizý rásimin memlekettik qyzmet formatyna aýystyrý qajet. Ótinimderdi qaraý merzimderi de naqty belgilenýi kerek.