Stýdenttiń óliminen keiin QazUÝ prorektory men fakýltet dekany qyzmetinen bosatyldy

Stýdenttiń óliminen keiin QazUÝ prorektory men fakýltet dekany qyzmetinen bosatyldy
Foto: ál-Farabi atyndaǵy Qazaq ulttyq ýniversitetiniń baspasóz qyzmeti

Almatydaǵy ál-Farabi atyndaǵy Qazaq ulttyq ýniversitetiniń birinshi kýrs stýdenti qaitys bolǵannan keiin oqý ornynda kadrlyq ózgerister jasaldy. Ýniversitettiń prorektory men fakýltet dekany qyzmetinen bosatylyp, oqiǵa bolǵan kúni kezekshilikte turǵan qyzmetkerler jumystan shettetildi, dep habarlaidy dalanews.kz.

Bul týraly ál-Farabi atyndaǵy Qazaq ulttyq ýniversitetiniń basshylyǵy resmi málimdeme jasady.

Ýniversitettiń habarlaýynsha, stýdenttiń qazasynan keiin jataqhanalardaǵy qaýipsizdik talaptarynyń saqtalýyna jáne jaýapty qyzmetkerlerdiń óz mindetterin oryndaýyna qatysty máseleler qaralǵan.

Nátijesinde joǵary oqý ornynyń birqatar basshysyna qatysty kadrlyq sheshim qabyldandy.

Atap aitqanda, jataqhanadaǵy qaýipsizdik pen tártipti qamtamasyz etý mindetterin tiisinshe oryndamaǵany úshin basqarma múshesi – áleýmettik turaqty damý jónindegi prorektor qyzmetinen bosatyldy.

Sondai-aq Geografiia jáne tabiǵatty paidalaný fakýltetiniń dekany da laýazymynan aiyryldy.

Budan bólek, qaiǵyly oqiǵa bolǵan kúni jataqhanada kezekshilikte turǵan qyzmetkerler jumystan shettetildi.

Qazirgi ýaqytta olardyń áreketterine quqyqtyq baǵa berilip jatyr.

Ýniversitet stýdenttiń otbasyna kóńil aitty

QazUÝ basshylyǵy birinshi kýrs stýdentiniń mezgilsiz qazasy ýniversitet ujymy úshin aýyr qaiǵy bolǵanyn jetkizdi.

Oqý orny marqumnyń ata-anasy jáne jaqyndarymen turaqty bailanysta ekenin málimdedi.

«Stýdentimizdiń qazasy – ýniversitet qaýymdastyǵy úshin orny tolmas aýyr qaiǵy. Marqumnyń ata-anasy men jaqyndaryna shyn júrekten kóńil aitamyz. Ýniversitet otbasymen turaqty bailanysta jáne barlyq qajetti kómekti kórsetýge daiyn», – delingen resmi málimdemede.

Ýniversitet basshylyǵy qaitys bolǵan stýdenttiń otbasyna qajetti qoldaý kórsetiletinin atap ótti.

QazUÝ jataqhanalarynda qaýipsizdik sharalary kúsheitildi

Qaiǵyly jaǵdaidan keiin ýniversitettiń barlyq jataqhanasynda baqylaý jumystary kúsheitilgen.

Atap aitqanda, keshki ýaqytta stýdentterdiń qaýipsizdigin qadaǵalaý sharalary qatańdatyldy.

Sonymen qatar bilim alýshylardyń qaýipsizdigin qamtamasyz etý jáne olarǵa kásibi psihologiialyq kómek kórsetý baǵytynda qosymsha sharalar qabyldandy.

Ýniversitet ákimshiligi mundai jumystardyń stýdentter úshin qaýipsiz orta qalyptastyrýǵa baǵyttalǵanyn jetkizdi.

Stýdent ólimine qatysty tergeý jalǵasyp jatyr

QazUÝ basshylyǵy qaiǵyly oqiǵanyń mán-jaiyn anyqtaý úshin tergeý organdarymen birlesip jumys istep jatqanyn málimdedi.

Oqý ornynyń habarlaýynsha, ýniversitet oqiǵaǵa qatysty derekterdi jasyrmaidy jáne istiń obektivti ári ashyq qaralýyna múddeli.

Degenmen Qazaqstan Respýblikasy Qylmystyq-protsestik kodeksiniń 201-babyna sáikes, sotqa deiingi tergep-tekserý derekterin jariialaýǵa zańnamalyq shekteýler bar.

Osy sebepti ýniversitet tergeý qupiiasyna jatatyn aqparatty kópshilikke usyna almaitynyn túsindirdi.

Soǵan qaramastan, jańa resmi málimetter belgili bolǵan jaǵdaida marqumnyń jaqyndary men qoǵamǵa jedel aqparat beriletinin jetkizdi.

QazUÝ stýdentiniń ólimi týraly ne belgili?

Eske salaiyq, 16 qarashada Almaty qalasynda ál-Farabi atyndaǵy Qazaq ulttyq ýniversitetiniń birinshi kýrs stýdentiniń qaitys bolǵany habarlanǵan edi.

Marqum Geografiia jáne tabiǵatty paidalaný fakýltetinde bilim alǵan.

Oqiǵadan keiin ýniversitet basshylyǵy stýdenttiń ata-anasy men týystaryna kóńil aityp, quqyq qorǵaý organdary tekserý júrgizip jatqanyn málimdegen.

Sondai-aq oqý orny kópshilikti resmi túrde rastalmaǵan málimetterdi taratpaýǵa shaqyrǵan.

17 qarashada stýdenttiń qazasyna bailanysty ýniversitettiń prorektory men fakýltet dekany qyzmetinen bosatylǵany belgili boldy.

Qazirgi ýaqytta oqiǵanyń naqty mán-jaiyn anyqtaýǵa baǵyttalǵan tergeý jumystary jalǵasyp jatyr.

Ázirge stýdenttiń ólimine qatysty túpkilikti tergeý qorytyndysy jariialanǵan joq.