Qazaqstanda 2026 jyly sharýalarǵa berilgen jeńildetilgen kredit kólemi alǵash ret 1,2 trln teńgege jetti. Al aýyl sharýashylyǵynyń jalpy ónim kólemi jyl basynan bergi on aida 5,2%-ǵa ósip, 8,9 trln teńgeni qurady. Bul týraly Úkimet otyrysynda Aýyl sharýashylyǵy ministri Aidarbek Saparov málimdedi, dep habarlaidy dalanews.kz.
Ministrdiń aitýynsha, memlekettik qoldaý sharalary óndiristi keńeitýge, aýyl sharýashylyǵy tehnikasyn jańartýǵa jáne fermerler úshin qarjylandyrýdyń qoljetimdiligin arttyrýǵa baǵyttalǵan.
Sýbsidiia túrindegi qoldaýmen shamamen 25 myń sharýashylyq qamtylǵan. Onyń 90%-ǵa jýyǵy shaǵyn jáne orta sharýashylyqtarǵa tiesili.
Ministr sýbsidiia sharýalardyń aldyn ala jumsaǵan shyǵyndarynyń bir bóligin óteýge baǵyttalǵanyn atap ótti. Fermerler aldymen tuqym, tehnika, mineraldyq tyńaitqyshtar men ósimdikterdi qorǵaý quraldaryn satyp alady. Keiin naqty jumsalǵan shyǵyndarynyń bir bóligi óteledi.
Sondai-aq qarajat bólýdiń ashyqtyǵyn arttyrý úshin sýbsidiialaýdyń memlekettik aqparattyq júiesi jańǵyrtylady.
«Biyl jeńildikpen beriletin kredit kólemi alǵash ret 1,2 trln teńgege jetti. Óndirýshilerdi qamtýdy keńeitý úshin kredit berýdiń alty arnasy iske qosylǵan. Kepilmen qamtamasyz etý múmkindigi jetkiliksiz sharýashylyqtar úshin qaryzdarǵa kepildik berý tetigi qoldanylady», - dedi Aidarbek Saparov.
Onyń málimetinshe, 2027 jylǵy egis naýqanyn erte qarjylandyrýǵa ótinim qabyldaý 1 qazanda bastalǵan.