Qazaqstanda 900 mlrd teńgege 125 jańa óndiris orny iske qosyldy

Qazaqstanda 900 mlrd teńgege 125 jańa óndiris orny iske qosyldy
pixabay.com

Qazaqstanda jyl basynan beri jalpy investitsiia kólemi 900 mlrd teńgeni quraityn 125 óndiristik joba iske qosyldy. Jyl sońyna deiin qalǵan jobalardy da paidalanýǵa berý josparlanyp otyr. Bul týraly Úkimet otyrysynda Ónerkásip jáne qurylys ministri Ersaiyn Naǵaspaev málimdedi, dep habarlaidy dalanews.kz.

Ministrdiń aitýynsha, biylǵy on aida ónerkásip óndirisiniń kólemi 9,3%-ǵa ósken. Jalpy investitsiia kólemi 1,7 trln teńgeden asatyn 200 jańa jobany iske qosý kózdelip otyr.

Olardyń júzege asýy nátijesinde 17 myńnan astam jumys orny ashylady. Onyń 5,5 myńy aýyldyq jerlerge tiesili bolady.

Jobalar tolyq óndiristik qýatyna shyqqan kezde jyl saiyn shamamen 1,5 trln teńgeniń ónimi óndirilip, onyń 500 mlrd teńgesi eksportqa baǵyttalady.

Jańa kásiporyndar Qazaqstanda buryn óndirilmegen ónim túrlerin shyǵarýǵa múmkindik beredi. Olardyń qatarynda temirjol bandajdary men tisti dońǵalaqtar, presteý jabdyqtary, laminat, tamshylatyp sýarý júieleri jáne kofe mashinalaryna arnalǵan aliýminii kapsýlalar bar.