Qazaqstanda 2026 jyldyń alǵashqy on aiynda ónerkásip óndirisiniń kólemi 9,3%-ǵa artty. Jyl sońyna deiin jalpy investitsiia kólemi 1,7 trln teńgeden asatyn 200 jańa kásiporyndy iske qosý josparlanyp otyr. Bul týraly Úkimet otyrysynda Ónerkásip jáne qurylys ministri Ersaiyn Naǵaspaev málimdedi, dep habarlaidy dalanews.kz.
Ministrdiń aitýynsha, jańa jobalardy júzege asyrý nátijesinde 17 myńnan astam jumys orny ashylady. Onyń ishinde 5,5 myńy aýyldyq jerlerde qurylady.
Kásiporyndar tolyq óndiristik qýatyna shyqqan kezde jyl saiyn shamamen 1,5 trln teńgeniń ónimi óndirilip, onyń 500 mlrd teńgesi eksportqa baǵyttalady.
«Jyl basynan beri jalpy investitsiia kólemi 900 mlrd teńgeni quraityn 125 joba iske qosyldy. Qalǵan jobalar aiaqtalýǵa jaqyndap, iske qosýǵa daiyndalýda», - dedi Ersaiyn Naǵaspaev.
Jańa óndiris oryndarynda Qazaqstanda buryn shyǵarylmaǵan ónim túrlerin igerý kózdelgen. Olardyń qatarynda temirjol bandajdary, dońǵalaqtar, presteý jabdyqtary, laminat, tamshylatyp sýarý júieleri jáne kofe mashinalaryna arnalǵan aliýminii kapsýlalar bar.
Sonymen qatar otandyq taýar óndirýshilerdi qoldaý maqsatynda tsifrlyq tizilim júrgizilip jatyr. Búginde onda 2,6 myńǵa jýyq qazaqstandyq óndirýshi men olardyń 72 myń taýary tirkelgen. Tizilimge 50 myńnan astam ótinim qaralǵan.
Tizilimniń negizgi satyp alý alańdarymen biriktirilýi nátijesinde jyl basynan beri 94 myń satyp alýda otandyq ónimge basymdyq berilgen.