5 myńnan astam jazylýshysy bar blogerler arnaiy tizilimge engizilmek

5 myńnan astam jazylýshysy bar blogerler arnaiy tizilimge engizilmek
pixabay.com

Qazaqstanda jedel habar almasý servisterin qospaǵanda, 16 jasqa tolmaǵan balalardy áleýmettik jelilerge tirkeýge tyiym salý usynyldy. Sonymen qatar 5 myńnan astam jazylýshysy bar onlain-platformalardy paidalanýshylardyń tizilimin júrgizý kózdelgen, dep habarlaidy dalanews.kz.

Bul talaptar «Qazaqstan Respýblikasynyń keibir zańnamalyq aktilerine onlain-platformalar jáne mass-media máseleleri boiynsha ózgerister men tolyqtyrýlar engizý týraly» zań jobasynda qarastyrylǵan.

Qujat Úkimettiń 2026 jylǵy 26 maýsymdaǵy №553 qaýlysymen Quryltaidyń qaraýyna engizilgen. Zań jobasy onlain-platformalardaǵy quqyqqa qaishy kontent kólemin azaitýǵa jáne tsifrlyq ortadaǵy qatynastardy retteýge baǵyttalǵan.

Jobaǵa sáikes, onlain-platformalardyń Qazaqstandaǵy ókildikteri zańnamada belgilengen tártippen mindetti eseptik tirkeýden ótýi kerek. Sondai-aq zańnamaǵa «aýdiovizýaldy platforma» uǵymyn engizip, olardyń operatorlarynyń qyzmet tártibin belgileý usynylady.

Ýákiletti organǵa 5 myńnan astam jazylýshysy bar onlain-platformalardy paidalanýshylardyń tizilimin júrgizý quzyretin berý kózdelgen.

Budan bólek, onlain-platformalarda bilim berý kýrstaryn nemese belgili bir sala boiynsha oqytý materialdaryn taratatyn paidalanýshylar óz biliktiligin rastaityn diplomy ne sertifikaty týraly málimetti kórsetýge mindettelýi múmkin.

Zań jobasynda «okkýlttik qyzmetter» uǵymyn engizý de qarastyrylǵan. Bul tabiǵattan tys, paranormaldy nemese ǵylymi turǵydan rastalmaǵan qabiletter týraly málimdemelerge negizdelgen qyzmetterdi qamtidy. Mundai qyzmetter týraly kontentte onyń oiyn-saýyq sipatynda ekeni jáne ǵylymi nemese praktikalyq turǵydan rastalmaǵany jóninde eskertý bolýy tiis.

Sondai-aq internet-basylymdardy esepke qoiý nemese qaita tirkeý kezinde qorlaý sipatyndaǵy elementteri bar domendik ataýlar men BAQ ataýlaryn paidalanýǵa shekteý engizý usynylǵan.

Joba boiynsha memlekettik organdardyń resmi jaýaptaryn jariialaǵan kezde buqaralyq aqparat quraldary olardy arnaiy tańbalaýy kerek. Al erkin qoljetimdi tele- jáne radioarnalar tizbesine engizilgen tele-radioarnalarǵa tizimge qosylǵan kúnnen bastap 30 kún ishinde habar taratý jumysyn uiymdastyrý mindeti júkteledi.

Quryltaidyń barlyq komiteti zań jobasyna oń qorytyndy bergen. Jumys tobynyń jeti otyrysy jáne komitettiń keńeitilgen otyrysy ótkizilgen. Komitet qujatty birinshi oqylymda maquldap, Quryltai otyrysynyń qaraýyna engizýdi usyndy.