Qazaqstanda zańǵa qaishy kontent taratqan onlain-platformalarǵa ákimshilik jaýapkershilik engizý usynyldy. Sondai-aq ýákiletti organnyń zańsyz materialdardy joiý týraly nusqamasyn oryndamaǵan platformalar men BAQ-ta balaǵat sóz qoldanǵandarǵa qatysty jaýapkershilik qarastyrylǵan, dep habarlaidy dalanews.kz.
Bul normalar «Ákimshilik quqyq buzýshylyq týraly kodekske onlain-platformalar jáne mass-media máseleleri boiynsha ózgerister men tolyqtyrýlar engizý týraly» zań jobasynda kózdelgen.
Qujat Qazaqstan Respýblikasy Úkimetiniń 2026 jylǵy 26 maýsymdaǵy №554 qaýlysymen Quryltaidyń qaraýyna engizilgen. Zań jobasy Prezidenttiń destrýktivti kontent taratqany úshin onlain-platformalardyń jaýapkershiligin zańnamalyq turǵyda bekitý jónindegi tapsyrmasyn oryndaý maqsatynda ázirlengen.
Joba aiasynda onlain-platformalardyń zańǵa qaishy kontent taratqany úshin ákimshilik jaýapkershiligin belgileý usynylady. Budan bólek, ýákiletti organnyń Qazaqstan aýmaǵyndaǵy onlain-platformalarda quqyqqa qaishy kontentti joiý jónindegi nusqamalaryn platforma ókildigi oryndamaǵan jaǵdaida da jaýapkershilik engizý kózdelgen.
Sondai-aq buqaralyq aqparat quraldary men onlain-platformalarda balaǵat sóz qoldanǵany úshin ákimshilik jaýapkershilik qarastyrylǵan. Qujatta mass-media jáne onlain-platformalar salasyndaǵy qoldanystaǵy zańnamany ózara sáikestendirý máselesi de qamtylǵan.
Zań jobasy boiynsha Quryltaidyń barlyq komiteti oń qorytyndy bergen. Komitettiń jeti jumys toby men keńeitilgen otyrysy ótkizilgen.
Komitet zań jobasyn birinshi oqylymda maquldap, Quryltai otyrysynyń qaraýyna engizýdi usyndy.