L. N. Gýmıleva atyndaǵy Eýrazıa ulttyq ýnıversıtetinde Respýblıka kúnin merekeleý aıasynda Italıanyń memlekettik nagradasy - Italıa juldyzy ordenin (ENDINE della Stella d ' Italia) EUÝ prorektory Dýman Aıtmaǵambetovke tapsyrý rásimi ótti. Joǵary marapatty Italıa Respýblıkasynyń Prezıdenti atynan Qazaqstandaǵy Italıa Elshisi, myrza Antonello De Rıý tabystady, dep habarlaıdy Dalanews.kz.
Bul orden Italıa Prezıdentiniń bastamasymen taǵaıyndalǵan jáne ol Italıa men basqa elder arasyndaǵy dostyq pen yntymaqtastyqty nyǵaıtýdaǵy erekshe eńbegi úshin, sondaı-aq mádenı, ǵylymı, ekonomıkalyq jáne bilim berý baılanystaryn damytýǵa qosqan úlesi úshin beriledi.
Atalǵan marapat Italıanyń halyqaralyq bedelin arttyrýǵa jáne halyqaralyq yntymaqtastyqty damytýǵa eleýli úles qosqan tulǵalarǵa tapsyrylady.
Bul mártebeli nagradany alý - L.N. Gýmılev atyndaǵy Eýrazıa ulttyq ýnıversıteti men Italıanyń bilim jáne ǵylym ınstıtýttary arasyndaǵy áriptestik qatynastardy damytýǵa, sondaı-aq Qazaqstan men Italıa arasyndaǵy baılanystardy nyǵaıtýǵa qosqan jeke úlestiń moıyndalýy bolyp tabylady.
Aıta ketsek, EUÝ-dyń ıtalıalyq ýnıversıtettermen jáne kompanıalarmen yntymaqtastyǵy joǵary deńgeıde júzege asyrylyp keledi. Ýnıversıtet Trento, Salerno, Genýıa, Mılano-Bıkokka, Mılan, Sıena sheteldikter ýnıversıteti, Katanıa, Týrın polıtehnıkalyq ýnıversıteti, Gabrıele d’Annýnsıo ýnıversıtetterimen akademıalyq utqyrlyq, qos dıplom baǵdarlamalary, taǵylymdamalar, profesorlarmen almasý, birlesken ǵylymı jobalar jáne basqa da baǵyttar boıynsha tyǵyz baılanys ornatqan.
EUÝ sondaı-aq Silkway ýnıversıtetter konsorsıýmynyń múshesi bolyp tabylady, onyń aıasynda ıtalıalyq joǵary oqý oryndarymen birlesken túrli ǵylymı jáne bilim berý jobalary júzege asyrylýda.
2019 jyldan bastap Italıa Elshiligi, EUÝ jáne Eni kompanıasy arasyndaǵy memorandým negizinde ýnıversıtette Enrıko Matteı atyndaǵy Italıa mádenı ortalyǵy jumys isteıdi. Qazirgi tańda ortalyqta ıtalán tili kýrstary júrgizilýde.
Birlesken jobalardyń ishinde erekshe atap óterligi — Mılano-Bıkokka ýnıversıtetimen birlesken «Green Energy Management» (Jasyl energetıkany basqarý) atty jyl saıynǵy jazǵy mektep. Bul mektep Ortalyq Azıa aımaǵy men ózge de óńirlerdiń sarapshylary men jas ǵalymdarynyń ózekti máselelerdi talqylaıtyn dástúrli alańyna aınaldy.
Atalǵan joba Eni kompanıasymen yntymaqtastyqty nyǵaıtýǵa, Eni ECU korporatıvtik ýnıversıtetimen birlesip «GREEN ENERGY TECHNOLOGIES» atty jańa magıstratýra baǵdarlamasyn engizýge, Padýa jáne Týrın polıtehnıkalyq ýnıversıtetterimen seriktestik ornatýǵa, sondaı-aq ýnıversıtet qyzmetinde jáne mádenıetinde turaqty damý kún tártibin ilgeriletetin «Jasyl keńse» jobasyn iske qosýǵa yqpal etti.
2024 jyldan bastap jazǵy mektep Ortalyq Azıanyń ártúrli elderinde ótkizile bastady (2017–2023 jyldary - Qazaqstanda, 2024 jyly - Qyrǵyzstanda, 2025 jyly - Ózbekstanda).
