Prezident Qasym-Jomart Toqaev Berik Asylovty Qazaqstan Respýblikasynyń Bas prokýrory laýazymyna qaita taǵaiyndady. Bul týraly Aqordanyń baspasóz qyzmeti habarlady, dep jazady dalanews.kz.
Memleket basshysy tiisti jarlyqqa qol qoiǵan. Osylaisha Berik Asylov elimizdiń Bas prokýrory qyzmetin odan ári jalǵastyratyn boldy.
Buǵan deiin Ádilet ministri Erlan Sársembaev jańa Konstitýtsiia kúshine engennen keiin eki ai ishinde Qazaqstanda birqatar joǵary laýazymdy tulǵa qaita taǵaiyndalýy tiis ekenin aitqan edi.
Ministrdiń túsindirýinshe, jańa Konstitýtsiianyń 95-babyna sáikes, ol kúshine engen kúnnen bastap eki ai ishinde, iaǵni 2026 jylǵy 1 shildeden keiin Bas prokýror, Ulttyq bank tóraǵasy, Joǵarǵy sot tóraǵasy, Ulttyq qaýipsizdik komitetiniń tóraǵasy, Joǵary sot keńesiniń tóraǵasy jáne Adam quqyqtary jónindegi ýákil taǵaiyndalýy qajet.
Berik Asylov 1964 jyly 28 aqpanda Jambyl oblysynda dúniege kelgen. Eńbek jolyn prokýratýra salasynda bastap, ár jyldary Almaty qalasy Alataý aýdany prokýratýrasynyń aǵa tergeýshisi, Bas prokýratýra janyndaǵy erekshe mańyzdy ister jónindegi tergeýshi jáne aǵa tergeýshi, Almaty aviatsiialyq kólik prokýrorynyń orynbasary, sondai-aq Bas prokýratýranyń jedel-izdestirý qyzmeti zańdylyǵyn qadaǵalaý bóliminiń bastyǵy qyzmetterin atqarǵan.
2001-2006 jyldary Ońtústik Qazaqstan oblysy prokýratýrasynda basshylyq laýazymdarda eńbek etti. Shymkent qalasynyń prokýrory, Ońtústik Qazaqstan oblysy prokýrorynyń orynbasary jáne birinshi orynbasary boldy.
Keiin Batys óńirlik kólik prokýrory, Aqtóbe oblysynyń prokýrory qyzmetterin atqardy. 2010 jyly Prezident ókimimen Bas prokýrordyń orynbasary bolyp taǵaiyndaldy.
2011-2017 jyldary Almaty qalasynyń prokýratýrasyn basqarsa, 2017-2019 jyldary Soltústik Qazaqstan oblysynyń prokýrory boldy. Al 2019 jyldyń naýryzynda Qazaqstan Respýblikasy Bas prokýrorynyń birinshi orynbasary qyzmetine taǵaiyndaldy.
2020 jylǵy 6 mamyrda Prezident jarlyǵymen Berik Asylovqa 2-synypty memlekettik ádilet keńesshisi synyptyq sheni berildi.
