Numbeo servisi 2026 jyldyń alǵashqy jartyjyldyǵyna arnalǵan álemdegi ómir súrý quny reitingin jańartty. Tizimge álemniń 547 qalasy, onyń ishinde Almaty men Astana da endi, dep habarlaidy dalanews.kz.
Zertteý qorytyndysyna sáikes Almaty jalpy reitingte 409-orynǵa jaiǵassa, Astana 469-orynnan kóringen. Bul Almatyda ómir súrý quny elordaǵa qaraǵanda joǵary ekenin kórsetedi.
Reitingti jasaý kezinde azyq-túlik, dámhana men meiramhana qyzmeti, kólik, kommýnaldyq qyzmetter jáne kúndelikti shyǵyndar esepke alynǵan. Al turǵyn úi satyp alý men ipoteka tólemderi eskerilmegen.
Numbeo málimetinshe, Almatynyń ómir súrý quny indeksi - 38,7 ball. Astanada bul kórsetkish 32,8 ball boldy. Sondai-aq, jaldaý aqysyn qosa eseptegendegi jalpy ómir súrý quny indeksi boiynsha da Almaty alda tur.
Ortalyq Aziia qalalary arasynda Almaty eń qymbat qala atansa, ekinshi orynda Astana ornalasqan. Odan keiin Tashkent, Bishkek jáne Dýshanbe tur.
Álemdik reitingte birinshi oryndy ómir súrý quny indeksi 123,1 ball bolǵan Tsiýrih ielendi. Al alǵashqy bestikke Djordjtaýn (Kaiman araldary), Liýtsern, Bazel jáne Jeneva qalalary kirdi. Eń tómen ómir súrý quny Úndistan qalalarynda tirkelgen, al reitingtiń sońǵy satysynda Koimbatýr ornalasqan.
