Jetisý oblysy qurylǵannan beri týrizmdi, sonyń ishinde Alakól kóliniń jaǵalaýyn damytý baǵytynda júieli jumystar atqarylyp keledi. Prezidenttiń tapsyrmasyna sáikes jaǵalaýdaǵy sanitarlyq tazalyqty qamtamasyz etýge erekshe kóńil bólingen, dep habarlaidy dalanews.kz.
Atap aitqanda, Aqshi, Kóktuma aýyldaryndaǵy kól jaǵalaýlarynyń tazalyq jumystarymen turaqty ainalysatyn arnaiy «Alakól Tazalyq» kommýnaldyq kásiporny qurylǵan, onda 50-ge jýyq qyzmetker jumys isteidi. Tazalyq jumystaryna 20-dan astam tehnika jumyldyrylǵan.
Bul rette kommýnaldyq jaǵajaiǵa 720 qoqys konteineri qoiylǵan. Sol siiaqty 44 kiim aýystyratyn kabina, 24 modýldik dárethana, 45 biodárethana ornatylǵan.
Qaiyqtar men paromdarǵa qatysty aitsaq, ótken jyly Alakóldegi shaǵyn júzý quraldarynyń qozǵalysyn retteý maqsatynda Jetisý oblysynda ortaq sý paidalaný jáne sý aidyndaryndaǵy qaýipsizdik qaǵidalary bekitildi. Atalǵan qaǵidalarda sý aidyndaryndaǵy qaýipsizdik talaptary jan-jaqty túsindirildi, olardy saqtamaǵany úshin jaýapkershilik belgilendi.
Jalpy, Alakól kólinde demalýshylardyń qaýipsizdigin qamtamasyz etý maqsatynda jaǵalaý aýmaǵynda táýlik boiy kezekshilik uiymdastyrylǵan. Bul jumystarǵa 14 qutqarýshy, 11 motorly qaiyq jumyldyrylǵan. Sonymen qatar biylǵy shomylý maýsymynda qoǵamdyq tártipti qamtamasyz etý úshin 50 politsiia qyzmetkeri, 16 qyzmettik avtokólik jáne 5 ushqyshsyz dron tartylǵan.
Sonymen qatar jaǵalaý boiynda 40 qutqarý munarasy ornatylyp, 13 shaqyrymǵa býi syzyqtary tartylǵan. Qaýipsizdikti qamtamasyz etý maqsatynda 39 beinebaqylaý kamerasy jumys isteidi jáne 7 pirs paidalanýǵa berilgen.
Kúndelikti sýda da, jaǵajaida da qaýipsizdik maqsatynda mamandar tarapynan turaqty túrde reid júrgiziledi.
Sondai-aq jaǵalaý aýmaǵynyń jai-kúiin baqylaý, onyń ishinde ekologiialyq mádeniettiń qarapaiym talaptarynyń saqtalýyn qadaǵalaý beinebaqylaý júiesi arqyly júzege asyrylady. Ornatylǵan beinekameralar jergilikti politsiianyń Jedel basqarý ortalyǵynyń júiesine qosylǵan. Sonyń nátijesinde qoqys tastaityn, kólik quraldaryn ruqsat etilmegen oryndarǵa qoiatyn jáne ózge de quqyq buzýshylyqtarǵa jol beretin azamattar beinejazbalar arqyly anyqtalyp, zańnamaǵa sáikes jaýapkershilikke tartylady.
Demalýshylar kól jaǵalaýynda jasalǵan jaǵdailarǵa oń baǵasyn berdi.
- Emdik qasieti bar, tabiǵaty tamasha Alakól kólin jaqsy kóremiz. Otbasymyzben jyl saiyn mindetti túrde bir maýsymda eki ret kelemiz. Biyl tazalyqqa erekshe kóńil bólingeni birden baiqalyp tur. Kiim aýystyratyn oryndar, jańa dárethanalar ornatylyp, kameralar qoiylǵan, jaǵajai taza. Jyldan jylǵa demalýshylarǵa jasalǵan jaǵdailar jaqsarǵany bizdi qýantady, - dedi demalýshylardyń biri.
- Biyl jaǵalaýdaǵy ózgerister birden kózge túsedi. Jaǵajai tap-taza, tazalyq jumystary turaqty júrgizilip jatyr. Kúnnen qorǵaityn qolshatyrlar, dárethanalar, kiim aýystyratyn jáne demalýǵa arnalǵan kabinalar ornatylǵan. Eń bastysy – tazalyqtyń saqtalǵanyn erekshe aitar edim. Árbir sanitarlyq torapta barlyq qajetti gigienalyq quraldar bar, qol jýýǵa arnalǵan suiyq sabynǵa deiin qoiylǵan. Jalpy, demalýǵa jaily ári qolaily jaǵdai jasalǵanyn kórip otyrmyz, – dedi demalysqa kelgen otbasy músheleri.
Eske salsaq, Alakól jaǵalaýynda sońǵy úsh jylda injenerlik jáne kólik infraqurylymyn damytý baǵytynda irgeli jobalar iske asyrylǵan bolatyn. Atap aitqanda, kólge aparatyn avtojoldar jańaryp, Úsharal áýejaiynyń ushý-qoný jolaǵy jańǵyrtyldy. Jazǵy maýsymda kólge kólikpen jetýdi qamtamasyz etýde temir jol baǵyty, áýe reisteri turaqty uiymdastyrylǵan. Oǵan qosa jaǵalaýdy jetkilikti elektr qýatymen qamtý maqsatynda 57 shaqyrym elektr jelisi men eki qosalqy stansa qurylysy aiaqtaldy. Bul elektr qýaty tapshylyǵyn joiyp, qajetti elektr energiiasynyń qoryn qalyptastyrýǵa múmkindik berdi. Qazirgi kezde Alakól jaǵalaýynda jobalyq qýaty jaǵynan elimizdegi iri jobalardyń biri - táýligine 6,5 myń tekshe metr sý tazarta alatyn káriz tazartý qondyrǵysynyń 2-shi kezeginiń qurylysy júrýde. Sonymen qatar, jaǵalaýdy bekitý jobasy da jalǵasýda. Jaǵalaý jieginiń shaiylýyn boldyrmaýǵa baǵyttalǵan joba 14 shaqyrymǵa jýyq jaǵalaý aýmaǵyn qamtidy. Ótken jyldyń shilde aiynda bastalǵan qurylys jumystaryn kelesi jyldyń jazynda aiaqtaý josparlanyp otyr.
