Pavlodar oblysyndaǵy kómir karerinde tragedıa oryn aldy. Dalanews.kz. saıty Pavlodarnews basylymyna silteme jasap, óndiriste qazaǵa ushyraǵan apat týraly habarlaıdy.
Aımaqtyq Memlekettik eńbek ınspeksıasy komıtetiniń departamenti habarlaýynsha, qaıǵyly oqıǵa týraly aqparat jumys berýshiden túsken. Tragedıa Baıanaýyl aýdanyndaǵy kómir kareriniń temirjol soqpaǵynda bolǵan.
Relsten shyqqan kómir júk vagondaryn kótergen krannyń trosy úzilip ketken. Ushyp ketken ilmek 1958 jyly týǵan teplovoz mashınıstine tıip ketken. Er adam sol jerde qaza tapqan.
Pavlodar oblysy polısıa departamenti habarlaǵandaı, teplovoz mashınıstiniń ólimine ákep soqqan eńbek qaýipsizdigi erejelerin buzý faktisi boıynsha polısıa aldyn ala tergeýdi bastady.
Oqıǵanyń jaǵdaılary men sebepteri tergeý barysynda anyqtalatyn bolady.
