Shyǵys Qazaqstan oblysynyń Zaisan jáne Tarbaǵatai aýdandaryndaǵy Úidene jáne Qandysý sý qoimalary apatty nysandar qataryna endi. Mamandardyń málimetinshe, gidrotehnikalyq qurylystardyń tozý deńgeii shamamen 70 paiyzǵa jetken. Bógetterge 60 jyldan astam ýaqyt boiy kúrdeli jóndeý júrgizilmegen, dep habarlaidy dalanews.kz.
Tv7.kz málimetinshe, osyǵan bailanysty biiktigi toǵyz qabatty úimen shamalas bógetter qazir tolyq qýatynda paidalanylmai otyr. Nátijesinde óńirdegi sýarmaly egistik alqaptarynyń kólemi aitarlyqtai qysqarǵan.
Zaisan aýdany ákiminiń orynbasary Ermek Qorabaevtyń aitýynsha, Úidene sý qoimasynyń jalpy syiymdylyǵy 75 mln tekshe metrdi quraidy. Alaida Ertis basseindik inspektsiiasynyń ruqsatyna sáikes, qazirgi tańda qoimada nebári 46 mln tekshe metr sý ǵana jinalǵan.
Al Úidene bógetin qalpyna keltirý jobasy birneshe ret tehnikalyq kemshilikterge bailanysty maquldanbai qalǵan. Soǵan qaramastan, «Qazsýshar» mamandary biylǵy qazan aiyna deiin jóndeý-qalpyna keltirý jumystarynyń túpkilikti josparyn bekitip, jobany memlekettik qarjylandyrýǵa usynýdy kózdep otyr.
ShQO boiynsha «Qazsýshar» filialy bóliminiń basshysy Dilara Janbolatovanyń málimdeýinshe, jobalyq-smetalyq qujattamaǵa túzetýler engizilip, memlekettik saraptamaǵa joldanǵan. Alaida joba teris qorytyndy alǵandyqtan, jobalaýshy uiymmen jasalǵan kelisimshart buzylǵan. Qazirgi ýaqytta qujattamany «Qazsýshar» mekemesiniń mamandary óz kúshimen qaita pysyqtap jatyr.
Al Qandysý sý qoimasy boiynsha qaita jańǵyrtý jumystarynyń egjei-tegjeili jospary ázirlenip qoiǵan.
