Astanada QR Eńbek jáne halyqty áleýmettik qorǵaý ministrligi men «Memlekettik áleýmettik saqtandyrý qory» AQ-nyń uiymdastyrýymen «Áleýmettik vektor: kásibilik, qurmet, tsifrlyq bolashaq» halyqaralyq forýmy ótýde, dep habarlaidy Dalanews.kz.
Áleýmettik qorǵaý júiesi qyzmetkerleri kúnine orai ótkizilgen forým áleýmettik qamsyzdandyrý júiesin derekter men tsifrlyq sheshimder negizinde damytý máselelerin talqylaýǵa arnalǵan basty dialog alańyna ainaldy. Is-shara Memleket basshysy qoiǵan jasandy intellektini keńinen engizý jónindegi mindetterdi iske asyrý aiasynda uiymdastyryldy.
Forým jumysyna QR Premer-ministri Oljas Bektenov, QR Prezidentiniń áleýmettik máseleler jónindegi keńesshisi Aleksei Tsoi, QR Eńbek jáne halyqty áleýmettik qorǵaý ministri Svetlana Jaqypova, QR Parlamentiniń depýtattary, memlekettik organdardyń, halyqaralyq uiymdardyń, beiindi vedomstvolar men áleýmettik saqtandyrý qorlarynyń (Ázerbaijan, Qyrǵyzstan jáne Ózbekstan elderinen) ókilderi, sondai-aq úkimettik emes uiymdar men sarapshylar qaýymdastyǵynyń músheleri qatysýda.
Forým qatysýshylaryna joldaǵan beineúndeýinde Halyqaralyq áleýmettik qamsyzdandyrý qaýymdastyǵynyń (budan ári – HÁQQ) prezidenti Mohammed Azman Qazaqstannyń áleýmettik qorǵaý júiesin jańǵyrtý jáne innovatsiialardy engizý baǵytyndaǵy kúsh-jigerin joǵary baǵalady.
«Qazaqstannyń áleýmettik qorǵaýdyń osyndai ozyq modelin iske asyrý tájiribesi búkil álem úshin qundy úlgi bola alady. Alǵa qarai kóz tiksek, Qazaqstannyń óz tájiribesimen bólisý jáne ózge memleketterge osyndai tásilderdi engizýge járdemdesý áleýeti zor ekenin nyq senimmen aitýǵa bolady», – dedi Mohammed Azman.
QR Premer-ministri Oljas Bektenov óz sózinde elimizde tiimdi áleýmettik qorǵaý júiesin qurý baǵytynda júrgizilip jatqan jumystarǵa toqtalyp, áleýmettik qorǵaý salasy qyzmetkerleriniń, ardagerler men qoǵamdyq uiymdar ókilderiniń áleýmettik osal toptaǵy azamattardy qoldaýdaǵy eleýli úlesin atap ótti.
«Prezident Qasym-Jomart Toqaev óz Joldaýynda memleket árbir azamattyń laiyqty tabysqa ie bolyp, sapaly áleýmettik qyzmetter alýy jáne óz bolashaǵyna senimdi bolýy úshin barlyq jaǵdaidy jasaitynyn atap ótti. Bizdiń basty mindetterimiz – áleýmettik teńdikti qamtamasyz etý, arnaýly áleýmettik qyzmetter júiesin damytý jáne osy salaǵa úzdik halyqaralyq standarttardy engizý. Áleýmettik qorǵaý júiesin damytýda jappai tsifrlandyrýǵa mańyzdy ról berilgen. Búginde JI-diń jańa tehnologiialary áleýmettik-eńbek qatynastarynyń barlyq salalaryna belsendi túrde engizilýde», — dep atap ótti Oljas Bektenov.
Halyqaralyq áleýmettik qamsyzdandyrý qaýymdastyǵynyń (HÁQQ) Bas hatshysy Marselo Abi-Ramia Kaetano forým qatysýshylaryna joldaǵan beineúndeýinde Qazaqstannyń HÁQQ-nyń jahandyq qaýymdastyǵyn damytýǵa qosqan úlesin joǵary baǵalap, eldiń áleýmettik salany tsifrlandyrýdaǵy jetistikterin erekshe atap ótti.
«Qazaqstannyń «Otbasynyń tsifrlyq kartasy» men «Áleýmettik qyzmetter portaly» siiaqty innovatsiialyq quraldary tehnologiialardy áleýmettik saiasatqa tiimdi engizýdiń jarqyn úlgisi sanalady jáne HÁQQ tarapynan úzdik tájiribe retinde moiyndaldy. Memlekettik qoldaýǵa muqtaj azamattardy proaktivti túrde anyqtaý jónindegi Qazaqstan tájiribesi qaýymdastyq músheleri arasynda keńinen taratýǵa laiyq», – dedi Marselo Abi-Ramia Kaetano.
Óz sózinde QR Eńbek jáne halyqty áleýmettik qorǵaý ministri Svetlana Jaqypova áleýmettik qoldaý tásilderin transformatsiialaý úderisine nazar aýdardy.
«Áleýmettik qyzmetkerlerdiń eńbegi – biz búgin júzege asyryp jatqan áleýmettik qoldaý arhitektýrasyn túrlendirý jónindegi aýqymdy jumystyń negizi. Biz dástúrli tásilderden naqty muqtajdyq kriteriilerine negizdelgen, adamǵa baǵdarlanǵan jańa modelge kóship kelemiz. Ózgeristerdiń ózeginde – memlekettik qoldaý sharalarynyń Biryńǵai tsifrlyq platformasyn engizý. Onyń negizgi tetigi – úi sharýashylyqtaryn skoringtik modeldeý. Tsifrlyq tehnologiialar otbasylardyń naqty qajettilikterin kórýge jáne sheshimderdi obektivti derekter negizinde qabyldaýǵa múmkindik beredi», – dep málimdedi Svetlana Jaqypova.
Forýmnyń negizgi sessiiasynda áleýmettik saladaǵy jasandy intellekttiń róli talqylandy. Memlekettik qyzmet salasyndaǵy Óńirlik habtyń Basqarýshy komitetiniń tóraǵasy Álihan Baimenov negizgi sessiia moderatory boldy. Bul bólimde áleýmettik salada jasandy intellektti qoldanýdyń mańyzy men áleýeti talqylandy. Negizgi baiandamamen QR Eńbek jáne halyqty áleýmettik qorǵaý vitse-ministri Viktoriia Shegai sóz sóilep, Ministrlik qyzmetinde jasandy intellekt pen tsifrlyq tehnologiialardy engizý barysyna sholý jasady. Ol áleýmettik qoldaý júiesiniń tsifrlandyrylýy, Áleýmettik qyzmetter portalynyń jumysy, sondai-aq múgedektikti qashyqtan belgileý jáne ataýly áleýmettik kómekti taǵaiyndaý úderisinde JI tehnologiialaryn qoldaný jóninde egjei-tegjeili baiandady. «Ótinish berýshilerdiń quqyqtaryn qorǵaý men baqylaý tetigi tolyq saqtai otyryp JI tiimdilikti arttyrady», – dep atap ótti ol.
Ázirbaijannyń Turaqty jáne jedel áleýmettik qamsyzdandyrý agenttigi (DOST) basqarma tóraǵasynyń orynbasary Seimýr Alyev áleýmettik qorǵaý júiesin tsifrlandyrý tájiribesimen bólisti. Ol óz elinde qyzmet kórsetýge innovatsiialyq tásilderdi engizý týraly baiandap berdi.
BUU-nyń Qazaqstandaǵy turaqty úilestirýshisi, eldik keńseniń basshysy Sarango Radnaragcha óz sózinde áleýmettik salany tsifrlandyrý jónindegi Qazaqstannyń bastamalary kórsetiletin qyzmetterdiń sapasy men dáldigin arttyrý turǵysynan erekshe ózektilikke ie ekenin atap ótti.
«Memlekettik áleýmettik saqtandyrý qory» AQ basqarma tóraǵasy Almas Qurmanov áleýmettik saqtandyrý júiesiniń qatysýshylaryna áleýmettik táýekelderdiń 5 túri týyndaǵan jaǵdaida tólemderdi taǵaiyndaýdyń negizgi tásilderi týraly aitty.
Forým qatysýshylary áleýmettik saladaǵy tsifrlyq sheshimderdi odan ári damytý úshin halyqaralyq yntymaqtastyq pen úzdik tájiribelermen almasýdyń mańyzdylyǵyn atap ótti.
Is-shara aiasynda QR Eńbek jáne halyqty áleýmettik qorǵaý ministrliginiń tsifrlyq sheshimderine arnalǵan LED-kórme, sondai-aq innovatsiialyq ońaltý quraldarynyń kórmesi uiymdastyryldy.
Forýmnyń qorytyndy bóliminde áleýmettik sala ardagerleri men qyzmetkerlerin, respýblikalyq «Áleýmettik qorǵaý júiesiniń úzdik qyzmetkeri jáne úzdik áleýmettik joba» baiqaýynyń jeńimpazdaryn marapattaý rásimderi jáne múgedektigi bar jandardyń shyǵarmashylyq ujymdary qatysatyn merekelik kontsert ótedi.
