استانادا ق ر ەڭبەك جانە حالىقتى الەۋمەتتىك قورعاۋ مينيسترلىگى مەن «مەملەكەتتىك الەۋمەتتىك ساقتاندىرۋ قورى» اق-نىڭ ۇيىمداستىرۋىمەن «الەۋمەتتىك ۆەكتور: كاسىبيلىك، قۇرمەت، سيفرلىق بولاشاق» حالىقارالىق فورۋمى وتۋدە، دەپ حابارلايدى Dalanews.kz.
الەۋمەتتىك قورعاۋ جۇيەسى قىزمەتكەرلەرى كۇنىنە وراي وتكىزىلگەن فورۋم الەۋمەتتىك قامسىزداندىرۋ جۇيەسىن دەرەكتەر مەن سيفرلىق شەشىمدەر نەگىزىندە دامىتۋ ماسەلەلەرىن تالقىلاۋعا ارنالعان باستى ديالوگ الاڭىنا اينالدى. ءىس-شارا مەملەكەت باسشىسى قويعان جاساندى ينتەللەكتىنى كەڭىنەن ەنگىزۋ جونىندەگى مىندەتتەردى ىسكە اسىرۋ اياسىندا ۇيىمداستىرىلدى.
فورۋم جۇمىسىنا ق ر پرەمەر-مينيسترى ولجاس بەكتەنوۆ، ق ر پرەزيدەنتىنىڭ الەۋمەتتىك ماسەلەلەر جونىندەگى كەڭەسشىسى الەكسەي سوي، ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا، ق ر پارلامەنتىنىڭ دەپۋتاتتارى، مەملەكەتتىك ورگانداردىڭ، حالىقارالىق ۇيىمداردىڭ، بەيىندى ۆەدومستۆولار مەن الەۋمەتتىك ساقتاندىرۋ قورلارىنىڭ (ازەربايجان، قىرعىزستان جانە وزبەكستان ەلدەرىنەن) وكىلدەرى، سونداي-اق ۇكىمەتتىك ەمەس ۇيىمدار مەن ساراپشىلار قاۋىمداستىعىنىڭ مۇشەلەرى قاتىسۋدا.
فورۋم قاتىسۋشىلارىنا جولداعان بەينەۇندەۋىندە حالىقارالىق الەۋمەتتىك قامسىزداندىرۋ قاۋىمداستىعىنىڭ (بۇدان ءارى – ءحاقق) پرەزيدەنتى موحاممەد ازمان قازاقستاننىڭ الەۋمەتتىك قورعاۋ جۇيەسىن جاڭعىرتۋ جانە يننوۆاسيالاردى ەنگىزۋ باعىتىنداعى كۇش-جىگەرىن جوعارى باعالادى.
«قازاقستاننىڭ الەۋمەتتىك قورعاۋدىڭ وسىنداي وزىق مودەلىن ىسكە اسىرۋ تاجىريبەسى بۇكىل الەم ءۇشىن قۇندى ۇلگى بولا الادى. العا قاراي كوز تىكسەك، قازاقستاننىڭ ءوز تاجىريبەسىمەن ءبولىسۋ جانە وزگە مەملەكەتتەرگە وسىنداي تاسىلدەردى ەنگىزۋگە جاردەمدەسۋ الەۋەتى زور ەكەنىن نىق سەنىممەن ايتۋعا بولادى»، – دەدى موحاممەد ازمان.
ق ر پرەمەر-مينيسترى ولجاس بەكتەنوۆ ءوز سوزىندە ەلىمىزدە ءتيىمدى الەۋمەتتىك قورعاۋ جۇيەسىن قۇرۋ باعىتىندا جۇرگىزىلىپ جاتقان جۇمىستارعا توقتالىپ، الەۋمەتتىك قورعاۋ سالاسى قىزمەتكەرلەرىنىڭ، ارداگەرلەر مەن قوعامدىق ۇيىمدار وكىلدەرىنىڭ الەۋمەتتىك وسال توپتاعى ازاماتتاردى قولداۋداعى ەلەۋلى ۇلەسىن اتاپ ءوتتى.
«پرەزيدەنت قاسىم-جومارت توقايەۆ ءوز جولداۋىندا مەملەكەت ءاربىر ازاماتتىڭ لايىقتى تابىسقا يە بولىپ، ساپالى الەۋمەتتىك قىزمەتتەر الۋى جانە ءوز بولاشاعىنا سەنىمدى بولۋى ءۇشىن بارلىق جاعدايدى جاسايتىنىن اتاپ ءوتتى. ءبىزدىڭ باستى مىندەتتەرىمىز – الەۋمەتتىك تەڭدىكتى قامتاماسىز ەتۋ، ارناۋلى الەۋمەتتىك قىزمەتتەر جۇيەسىن دامىتۋ جانە وسى سالاعا ۇزدىك حالىقارالىق ستاندارتتاردى ەنگىزۋ. الەۋمەتتىك قورعاۋ جۇيەسىن دامىتۋدا جاپپاي سيفرلاندىرۋعا ماڭىزدى ءرول بەرىلگەن. بۇگىندە ءجي-دىڭ جاڭا تەحنولوگيالارى الەۋمەتتىك-ەڭبەك قاتىناستارىنىڭ بارلىق سالالارىنا بەلسەندى تۇردە ەنگىزىلۋدە»، — دەپ اتاپ ءوتتى ولجاس بەكتەنوۆ.
حالىقارالىق الەۋمەتتىك قامسىزداندىرۋ قاۋىمداستىعىنىڭ (ءحاقق) باس حاتشىسى مارسەلو ابي-راميا كاەتانو فورۋم قاتىسۋشىلارىنا جولداعان بەينەۇندەۋىندە قازاقستاننىڭ ءحاقق-نىڭ جاھاندىق قاۋىمداستىعىن دامىتۋعا قوسقان ۇلەسىن جوعارى باعالاپ، ەلدىڭ الەۋمەتتىك سالانى سيفرلاندىرۋداعى جەتىستىكتەرىن ەرەكشە اتاپ ءوتتى.
«قازاقستاننىڭ «وتباسىنىڭ سيفرلىق كارتاسى» مەن «الەۋمەتتىك قىزمەتتەر پورتالى» سياقتى يننوۆاسيالىق قۇرالدارى تەحنولوگيالاردى الەۋمەتتىك ساياساتقا ءتيىمدى ەنگىزۋدىڭ جارقىن ۇلگىسى سانالادى جانە ءحاقق تاراپىنان ۇزدىك تاجىريبە رەتىندە مويىندالدى. مەملەكەتتىك قولداۋعا مۇقتاج ازاماتتاردى پرواكتيۆتى تۇردە انىقتاۋ جونىندەگى قازاقستان تاجىريبەسى قاۋىمداستىق مۇشەلەرى اراسىندا كەڭىنەن تاراتۋعا لايىق»، – دەدى مارسەلو ابي-راميا كاەتانو.
ءوز سوزىندە ق ر ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا الەۋمەتتىك قولداۋ تاسىلدەرىن ترانسفورماسيالاۋ ۇدەرىسىنە نازار اۋداردى.
«الەۋمەتتىك قىزمەتكەرلەردىڭ ەڭبەگى – ءبىز بۇگىن جۇزەگە اسىرىپ جاتقان الەۋمەتتىك قولداۋ ارحيتەكتۋراسىن تۇرلەندىرۋ جونىندەگى اۋقىمدى جۇمىستىڭ نەگىزى. ءبىز ءداستۇرلى تاسىلدەردەن ناقتى مۇقتاجدىق كريتەرييلەرىنە نەگىزدەلگەن، ادامعا باعدارلانعان جاڭا مودەلگە كوشىپ كەلەمىز. وزگەرىستەردىڭ وزەگىندە – مەملەكەتتىك قولداۋ شارالارىنىڭ ءبىرىڭعاي سيفرلىق پلاتفورماسىن ەنگىزۋ. ونىڭ نەگىزگى تەتىگى – ءۇي شارۋاشىلىقتارىن سكورينگتىك مودەلدەۋ. سيفرلىق تەحنولوگيالار وتباسىلاردىڭ ناقتى قاجەتتىلىكتەرىن كورۋگە جانە شەشىمدەردى وبەكتيۆتى دەرەكتەر نەگىزىندە قابىلداۋعا مۇمكىندىك بەرەدى»، – دەپ مالىمدەدى سۆەتلانا جاقىپوۆا.
فورۋمنىڭ نەگىزگى سەسسياسىندا الەۋمەتتىك سالاداعى جاساندى ينتەللەكتتىڭ ءرولى تالقىلاندى. مەملەكەتتىك قىزمەت سالاسىنداعى وڭىرلىك حابتىڭ باسقارۋشى كوميتەتىنىڭ ءتوراعاسى ءاليحان بايمەنوۆ نەگىزگى سەسسيا مودەراتورى بولدى. بۇل بولىمدە الەۋمەتتىك سالادا جاساندى ينتەللەكتتى قولدانۋدىڭ ماڭىزى مەن الەۋەتى تالقىلاندى. نەگىزگى باياندامامەن ق ر ەڭبەك جانە حالىقتى الەۋمەتتىك قورعاۋ ۆيسە-مينيسترى ۆيكتوريا شەگاي ءسوز سويلەپ، مينيسترلىك قىزمەتىندە جاساندى ينتەللەكت پەن سيفرلىق تەحنولوگيالاردى ەنگىزۋ بارىسىنا شولۋ جاسادى. ول الەۋمەتتىك قولداۋ جۇيەسىنىڭ سيفرلاندىرىلۋى، الەۋمەتتىك قىزمەتتەر پورتالىنىڭ جۇمىسى، سونداي-اق مۇگەدەكتىكتى قاشىقتان بەلگىلەۋ جانە اتاۋلى الەۋمەتتىك كومەكتى تاعايىنداۋ ۇدەرىسىندە جي تەحنولوگيالارىن قولدانۋ جونىندە ەگجەي-تەگجەيلى باياندادى. «ءوتىنىش بەرۋشىلەردىڭ قۇقىقتارىن قورعاۋ مەن باقىلاۋ تەتىگى تولىق ساقتاي وتىرىپ جي تيىمدىلىكتى ارتتىرادى»، – دەپ اتاپ ءوتتى ول.
ءازىربايجاننىڭ تۇراقتى جانە جەدەل الەۋمەتتىك قامسىزداندىرۋ اگەنتتىگى (DOST) باسقارما ءتوراعاسىنىڭ ورىنباسارى سەيمۋر الىيەۆ الەۋمەتتىك قورعاۋ جۇيەسىن سيفرلاندىرۋ تاجىريبەسىمەن ءبولىستى. ول ءوز ەلىندە قىزمەت كورسەتۋگە يننوۆاسيالىق تاسىلدەردى ەنگىزۋ تۋرالى بايانداپ بەردى.
بۇۇ-نىڭ قازاقستانداعى تۇراقتى ۇيلەستىرۋشىسى، ەلدىك كەڭسەنىڭ باسشىسى سارانگو رادناراگچا ءوز سوزىندە الەۋمەتتىك سالانى سيفرلاندىرۋ جونىندەگى قازاقستاننىڭ باستامالارى كورسەتىلەتىن قىزمەتتەردىڭ ساپاسى مەن دالدىگىن ارتتىرۋ تۇرعىسىنان ەرەكشە وزەكتىلىككە يە ەكەنىن اتاپ ءوتتى.
«مەملەكەتتىك الەۋمەتتىك ساقتاندىرۋ قورى» اق باسقارما ءتوراعاسى الماس قۇرمانوۆ الەۋمەتتىك ساقتاندىرۋ جۇيەسىنىڭ قاتىسۋشىلارىنا الەۋمەتتىك تاۋەكەلدەردىڭ 5 ءتۇرى تۋىنداعان جاعدايدا تولەمدەردى تاعايىنداۋدىڭ نەگىزگى تاسىلدەرى تۋرالى ايتتى.
فورۋم قاتىسۋشىلارى الەۋمەتتىك سالاداعى سيفرلىق شەشىمدەردى ودان ءارى دامىتۋ ءۇشىن حالىقارالىق ىنتىماقتاستىق پەن ۇزدىك تاجىريبەلەرمەن الماسۋدىڭ ماڭىزدىلىعىن اتاپ ءوتتى.
ءىس-شارا اياسىندا ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ سيفرلىق شەشىمدەرىنە ارنالعان LED-كورمە، سونداي-اق يننوۆاسيالىق وڭالتۋ قۇرالدارىنىڭ كورمەسى ۇيىمداستىرىلدى.
فورۋمنىڭ قورىتىندى بولىمىندە الەۋمەتتىك سالا ارداگەرلەرى مەن قىزمەتكەرلەرىن، رەسپۋبليكالىق «الەۋمەتتىك قورعاۋ جۇيەسىنىڭ ۇزدىك قىزمەتكەرى جانە ۇزدىك الەۋمەتتىك جوبا» بايقاۋىنىڭ جەڭىمپازدارىن ماراپاتتاۋ راسىمدەرى جانە مۇگەدەكتىگى بار جانداردىڭ شىعارماشىلىق ۇجىمدارى قاتىساتىن مەرەكەلىك كونسەرت وتەدى.
