Kún tártibinde turǵan ózekti másele – azamattardy ekonomikalyq patriotizm rýhynda tárbieleý, dedi Qasym-Jomart Toqaev Respýblika kúnine arnalǵan saltanatty sharada sóilegen sózinde, dep habarlaidy Dalanews.kz. Aqordaǵa silteme jasap.
— Jasandy intellekt dáýirinde túrli múmkindikter geometriialyq progressiiamen artyp keledi, jańa salalar men biznestiń jańa túrleri mindetti túrde paida bolady. Bul — oilai biletin, belsendi jastar úshin «altyn múmkindik». Memleket pen qoǵam jas talanttardy qoldaýy tiis, biz muny júzege asyramyz. Kún tártibinde turǵan ózekti mindet — azamattardy ekonomikalyq patriotizm rýhynda tárbieleý. Bul otandyq óndirýshilerdi qoldaý, kásipkerlerimizdiń ideialary men startaptaryna investitsiia salý jáne olardyń ónimderin tutyný týraly bolyp otyr. Munyń ózi de azamattyq birliktiń kórinisi, — dedi Prezident.
Ol qazirgi ýaqytta ulttyq brendterimizdiń sany artyp kele jatqanyn atap ótti. Ulttyq ónim elimizdi búkil álemge tanytady, sondyqtan Made in Qazaqstan tańbasy sapa men senimniń nyshanyna ainalýy tiis.
— Shetel azamattarynyń bizdiń taýarlarǵa degen qyzyǵýshylyǵynyń artýy — otandyq biznestiń tabysty damyp kele jatqanynyń kórsetkishi. Kompaniialarymyz jahandyq naryqqa shyǵyp, óz qyzmetin keńeitip, Qazaqstandy qarqyndy damyp kele jatqan, ozyq el retinde tanytyp otyr. Adal kásipkerlerdi óz patriotizmin naqty ispen dáleldep júrgen azamattar dep ádil sanaýǵa bolady. Óitkeni olar tabandy eńbegimen kóptegen jumys oryndaryn ashyp, halyqtyń ál-aýqatyn arttyrýǵa zor úles qosýda. Shaǵyn jáne orta biznesti qoldaý memlekettik saiasattyń basty basymdyqtarynyń biri bolyp qala beredi, — dedi Memleket basshysy.
