Túrkistan oblysynda 2025 jyly «Aýyl – El besigi» jobasy aiasynda 142 eldi mekende 140 jobany (54 – ótpeli, 86 – jańa jobalar) iske asyrýǵa 21,8 mlrd. teńge bólindi, dep habarlaidy Dalanews.kz
Atap aitqanda, osy qarjy arqyly 7 mektep kúrdeli jóndeýden ótse, 17 sport nysanynyń qurylysy jáne 1 sport mektebiniń kúrdeli jóndeý jumystary júredi. 10 mádeniet nysany salynyp, 6 nysan kúrdeli jóndeýden ótedi. Sonymen birge 2 aýyz sý nysany kúrdeli jóndeýden ótip, 7 elektr qýatymen jabdyqtaý nysanynyń qurylysy júredi. 90 joba ishki kóshelerdi ortasha jóndeýge baǵyttalǵan.
Atalǵan joba aiasyndaǵy jumystar oblys ákimi apparatynyń aptalyq májilisinde talqylandy. Óńir basshysy Nuralhan Kósherov jaýaptylarǵa mindetterin sapaly atqarýdy tapsyrdy.
– «Aýyl – El besigi» jobasy aiasyndaǵy jumystardy ýaqtyly ári sapaly aiaqtaýdy tapsyramyn. Jergilikti turǵyndardy jumyspen qamtý kerek. Árbir joba zerdelenip, qadaǵalanady. Jalpy oblys aýmaǵyndaǵy qurylys nysandarynyń bári baqylaýda tur. Oblystyq basqarma basshylary men aýdan, qala ákimderi jumysty shiratyp, sapaly atqarsyn. Aimaqty damytý jospary, indikatorlardyń oryndalýy boiynsha arnaiy zerdeleý júrgiziledi, – dedi Nuralhan Kósherov.
Májiliste óńirdi aýyz sýmen qamtý jáne «Jaily mektep» jobasyn júzege asyrý máseleleri de talqylandy. Túrkistan oblysyndaǵy qalalar aýyz sýmen tolyq qamtylsa, aýyldardyń qamtý kórsetkishi jyl saiyn ulǵaiyp keledi. Arys, Shardara, Lengir, Saryaǵash qalalaryndaǵy aýyz sý júielerin retteý máselesi aitylyp, tiisti usynystar berildi. Aýyz sýmen qamtý boiynsha oblysta 63 joba júzege asyrylýda. Onyń 7-eýi qalada bolsa, 56 joba aýyldarda júzege aspaq. Biyl 36 joba júzege asyp, 30 eldi meken sapaly aýyz sýmen qamtylsa, 7 eldi mekenniń sý qubyrlary jańartylady. 2 eldi mekenge sý qubyrlary salynady.
Oblysta «Jaily mektep» jobasy arqyly 29 mekteptiń qurylysy josparlansa, búginde 13 mektep tapsyrylǵan. 9 mektepte oqý protsesi bastalǵan. Biyl qalǵan 16 mektep tapsyrylady dep kútilip otyr. Bilim uialarynyń qurylysy oblys ákiminiń qatań baqylaýyna alynǵan. Mektepterdi bilikti basshylarmen jáne ustazdarmen qamtý jumysy da nazarda tur.
