Maqtaaral aýdanynyń óndiristik áleýeti jyl saiyn artyp keledi. Aýdan ákimi Baqyt Asanov jýyrda Qazaqstan men Qytai memleketteri arasyndaǵy iskerlik yntymaqtastyq negizinde qurylǵan «FANGAO kiim tigý» JShS-ń ókili Djý Ian Kýnmen kezdesti, dep habarlaidy Dalanews.kz
Bul kezdesýdiń maqsaty – Atakent kentinde zamanaýi kiim tigý fabrikasyn ashý máselesi. Atalǵan kásiporyn – eki el arasyndaǵy óndiristik kooperatsiianyń jarqyn kórinisi. «FANGAO» kompaniiasy Atakent kentinen jalpy kólemi 1 200 sharshy metrdi quraityn, tolyq jóndeýden ótken ǵimaratta kiim tigý fabrikasyn iske qosýdy josparlap otyr. Bul joba aýdan ekonomikasyna eleýli serpin berip qana qoimai, toqyma jáne jeńil ónerkásip salasynda jańa múmkindikterge jol ashpaq.
Fabrikanyń basty missiiasy – otandyq naryqqa zamanaýi talaptarǵa sai, joǵary sapaly mektep kiimderin usyný. Alǵashqy kezeńde Maqtaaral aýdany men kórshiles aýdandardyń mektep oqýshylaryn tolyqtai otandyq ónimmen qamtý kózdelýde. Mundai bastama ata-analar úshin de tiimdi, sebebi sapa men baǵa arasyndaǵy tepe-teńdik saqtalyp, sheteldik ónimderge táýeldilik azaiady. Bolashaqta fabrika óz ónimderin elimizdiń basqa óńirlerine de usynýdy josparlap otyr.
Jańa óndiris ornynyń iske qosylýy - óńir úshin úlken áleýmettik mańyzǵa ie. Josparǵa sáikes, fabrika 200-ge jýyq adamdy turaqty jumyspen qamtityn bolady. Bul – jergilikti turǵyndar úshin tabys kózi ǵana emes, kásibi damýǵa, jańa daǵdylardy meńgerýge múmkindik beretin alań. Kásiporyn sheberlikke mán berip, sapaly kadrlyq quram qalyptastyrý maqsatynda maýsym aiynyń sońynan bastap jumysqa qabyldaý jáne oqytý kezeńderin bastamaq. Bolashaq qyzmetkerler tigin isiniń qyr-syryn úirenip, arnaiy oqytý baǵdarlamalarynan ótedi. Mundai ádis kadrlardyń biliktiligin arttyryp qana qoimai, ónim sapasynyń joǵary bolýyn qamtamasyz etedi.
