AQSh prezidenti Donald Tramp ózara baj dep atalatyn jarlyǵy 7 tamyzdyń tún ortasynda (Máskeý ýaqytymen 07:00) óz kúshine engenin rastady, dep habarlaidy Dalanews.kz.
"Ózara baj týraly jarlyq tún ortasynda óz kúshine enedi", dep jazdy Tramp Truth Social-daǵy paraqshasynda.
Aq úi basshysynyń baǵalaýy boiynsha, importtyq bajdar Amerika ekonomikasyna AQSh-pen saýda qatynastaryn "jyldar boiy teris paidalanyp kelgen elderden milliardtaǵan dollar tartýǵa múmkindik beredi".
Aita ketsek, 1 tamyzda Tramp 60-tan astam memleket pen Eýropalyq odaqqa qatysty da 15%-dan 41%-ǵa deiingi aralyqty qamtityn baj salyǵyn engizý týraly jarlyqqa qol qoidy. Eń joǵary tarifter Siriia (41%), Laos (40%), Mianma (40%), Shveitsariia (39%), Irak (35%) jáne Serbiia (35%) siiaqty memleketterge baǵyttalǵan. Qazaqstanǵa 25 paiyzdyq baj salyǵy engiziletini de eskertilgen.
Saýda ministrligi aqparatyna súiensek, engizilgen tarif AQSh-qa Qazaqstannan jetkiziletin jalpy eksport kóleminiń nebári 4,8%-yna áser etedi, al qalǵan 95,2%-y jańa kedendik bajdan tys qalady. Qazir Qazaqstan AQSh-qa munai, ýran, kúmis, ferroqorytpalar, tantal, titan, berillii jáne ózge de ónim túrlerin eksporttaidy. Bul ónimderdiń basym bóligi tarifsiz, shekteýsiz eksporttalyp jatyr.
Bul tizimde Resei joq. Sebebi sanktsiialarǵa bailanysty arada alys-beris áldeqashan toqtaǵan. Degenmen Tramp 8 tamyzdan keiin Reseige munai salasyn qamtityn qatań sanktsiia engizetinin jariialap, ýltimatým qoiǵan bolatyn. Bul rette belgilisi, 6 tamyzda AQSh prezidentiniń Resei munaiyn tutynyp qana qoimai, ony óńdep Batys elderine satý arqyly ekonomikasyn kóterip otyrǵan Úndistanǵa baj salyǵyn salatyn jarlyqqa qol qoiǵany. Ol tamyzdyń sońynda kúshine enedi dep kútiledi. Aq úi Qytaiǵa da osyndai shara qoldanylatynyn jariialap úlgerdi. Osy máselelerdi talqylaý úshin AQSh pen RF prezidentteri kezdespek niette. Bul týraly Kremlde Vladimir Pýtin AQSh prezidentiniń arnaiy ókili Stiven Ýitkoffty qabyldaǵannan keiin aityldy. Búgin qos kóshbasshynyń kezdesýi 11 tamyzǵa belgilengeni belgili boldy.
Bul rette saitymyzda "Tramptyń baj salyǵy: Saýda ministrligi mán-jaidy túsindirdi" degen maqala jariialanǵan bolatyn.
