Astanada inDrive júrgizýshisiniń jolaýshy qyzdyń kózinshe mastýrbatsiia jasaǵan oqiǵasynan keiin, kompaniianyń negizin qalaýshy Arsen Tomskii shuǵyl qaýipsizdik sharalaryn qolǵa alyp, ishki tártipti qatańdatty, dep habarlaidy Dalanews.kz.
Endi inDrive servisi arqyly qatynaityn kólikte júrgizýshiniń jolaýshyǵa qyryndaýy nemese tanysýǵa talpynysy da "airyqsha qaýipti oqiǵa" retinde baǵalanyp, qarýly shabýylmen teń dárejede jazalanady. Tomskiidiń aitýynsha, áielderdiń qaýipsizdigi endi onyń jeke basym baǵytyna ainalady. Osyǵan bailanysty kompaniia Qazaqstandaǵy áielderge qatysty qysym men diskriminatsiiaǵa qarsy keń kólemdi aqparattyq jáne GR-naýqanǵa daiyndyqty bastady.
"Biz erejemizdi túbegeili qatańdattyq. Tipti jai ǵana flirt jasaý áreketi endi ómirge qaýip tóndirýmen birdei aýyr quqyq buzýshylyq dep sanalady. Bul eki qyzdyń ákesi retinde ózimniń jeke basymnyń basymdyǵy", – dep jazdy Tomskii Threads jelisindegi paraqshasynda.
Ol Qazaqstanda áielderge qatysty qysym men diskriminatsiianyń áli de kóptegen salada kezdesetinin atap ótti.
Eske sala ketsek, buǵan deiin Astanada kólik júrgizýshisi jolaýshy qyz ben onyń anasynyń kózinshe mastýrbatsiia jasap, saldarynan 15 táýlikke qamaýǵa alynǵan edi. Zardap shekken qyz bolǵan jaǵdaidy videoǵa túsirip alyp, politsiiaǵa júgingen. Alaida politsiia bóliminde oǵan qyzmetkerlerdiń biri qorlaityn pikir aityp, bul jaǵdai oǵan qosymsha psihologiialyq soqqy bolyp tigen.
