Astanadaǵy №97 mektep-gımnazıasynda «Qazaqstan Respýblıkasynyń jańa Konstıtýsıasy: Ádiletti memleketke qadam» taqyrybynda qalalyq semınar ótti, dep habarlaıdy Dala News.
İs-shara Astana qalasy ákimdiginiń Ádistemelik ortalyǵynyń uıymdastyrýymen ótti. Oǵan qala mektepteriniń tarıh páni muǵalimderi, bilim berý salasynyń mamandary men sarapshylar qatysty.
Semınar barysynda Qazaqstan Respýblıkasynyń jańa Konstıtýsıasy eldi ádiletti, quqyqtyq jáne demokratıalyq memleket qurýǵa baǵyttaıtyny atap ótildi. Sonymen qatar konstıtýsıalyq quqyq, memlekettik basqarý, memleket jáne quqyq teorıasy men tarıhy turǵysynan akademıalyq talqylaýlar júrgizildi.
Semınardyń negizgi maqsaty – Konstıtýsıaǵa engizilgen ózgerister men tolyqtyrýlardyń mánin, mazmunyn jáne quqyqtyq negizderin pedagogterge jan-jaqty túsindirý, sondaı-aq «Ádiletti Qazaqstan» tujyrymdamasynyń qaǵıdattaryn talqylaý boldy.
Konferensıa aıasynda 2026 jylǵy Konstıtýsıanyń 94-baby 1-tarmaǵyna erekshe nazar aýdarylyp, onyń mazmuny, ózekti máseleleri jáne kúshine ený tártibi qarastyryldy.
İs-sharaǵa zań ǵylymdarynyń doktory, L.N. Gýmılev atyndaǵy Eýrazıa ulttyq ýnıversıtetiniń profesory Jamalıden Ibragımov jáne Ádistemelik ortalyq basshysynyń orynbasary Alma Mýhamedjanova qatysty.
Spıkerler óz baıandamalarynda konstıtýsıalyq reformalardyń quqyqtyq negizderine taldaý jasap, bilim berý prosesinde bul taqyrypty tıimdi jetkizý joldaryn usyndy.
Semınarǵa Astana qalasynan júzden astam pedagogtiń qatysqany aıtyldy. Qatysýshylar tájirıbe almasyp, jańa oqý materıaldaryn talqylady, sondaı-aq oqýshylarǵa Konstıtýsıalyq ózgeristerdi túsindirýdiń zamanaýı tásilderin qarastyrdy.
Uıymdastyrýshylardyń aıtýynsha, mundaı is-sharalar pedagogterdiń kásibı biliktiligin arttyrýǵa, quqyqtyq mádenıetti nyǵaıtýǵa jáne «Ádiletti Qazaqstan» qundylyqtaryn bilim berý keńistiginde keńinen nasıhattaýǵa baǵyttalǵan.
