Qaraǵandy oblysynda kásipkerlerge kartopty taýarlyq birja arqyly satpaǵany úshin 69 ákimshilik quqyqbuzýshylyq týraly hattama jasaldy. Bul týraly Básekelestikti qorǵaý jáne damytý agenttigi málimdedi, dep habarlaidy Dalanews.kz.
Agenttikke zańbuzýshylyqtar týraly aqparatty oblystyq prokýratýra usynǵan. Aita keteiik, Qazaqstanda 2015 jyldan bastap bekitilgen taýarlyq birja arqyly satylýy tiis ónimder tizimine salmaǵy 60 tonnadan asatyn jańa jáne salqyndatylǵan kartop partiialary kiredi.
2022–2024 jyldar aralyǵynda birja týraly zańnamany buzǵan 12 kásipkerge hattama toltyrylǵan. Olardyń basym bóligi zań buzǵanyn moiyndap, aiyppul tóleýge kelisken. Qazirdiń ózinde memleket paidasyna 7,3 mln teńge óndirildi.
“Úsh kásipkerge qatysty jasalǵan 22 ákimshilik material sotqa joldandy. Olar óz quqyqtaryn paidalanyp, sot tártibimen qaraý jóninde ótinish bergen”, – dep málimdedi agenttik.
Aita keteiik, 2025 jyldyń mamyrynda áleýmettik mańyzy bar azyq-túlik taýarlarynyń baǵalary ártúrli baǵytta ózgeristerge ushyraǵan edi.
Saýda jáne integratsiia ministrliginiń habarlaýynsha, keibir azyq-túlik taýarlarynyń baǵalary arzandady. Mysaly, 2025 jyldyń 27 mamyryndaǵy derekter boiynsha aldyńǵy aptamen salystyrǵanda qyryqqabat 3,4%-ǵa, jumyrtqa 0,7%-ǵa, qaraqumyq, makaron jáne kúnbaǵys maiy 0,1-0,2%-ǵa arzandaǵan.
Nan men kúrishtiń baǵasy turaqty bolyp, ózgerissiz qaldy.
"Sonymen birge keibir ónimderdiń baǵasy ósti. Sońǵy aptada sábiz 4,2%-ǵa, kartop 2,8%-ǵa, piiaz 2,5%-ǵa, tuz 1,6%-ǵa, súzbe 0,8%-ǵa, sút pen qant 0,3%-ǵa, mai, siyr eti men taýyq eti 0,2%-ǵa, un men airan 0,1%-ǵa qymbattady", - dep jazylǵan habarlamada.
2025 jyldyń basynan beri áleýmettik mańyzy bar azyq-túlik taýarlary baǵasynyń indeksi 6,8%-ǵa ósti.
Baǵalardy turaqtandyrý jáne azyq-túlik qaýipsizdigin qamtamasyz etý úshin jedel sharalar qabyldanýda. Atap aitqanda, Qytaidan, Pákistannan jáne Ózbekstannan erte pisetin kókónister jetkizý jumysy uiymdastyryldy. Qazirgi ýaqytta Astanada ministrliktiń qoldaýymen "QTJ Ekspress" AQ jetkizgen 50 refrijerator konteiner kartop túsirilýde. Jalpy ishki naryqty ónimmen tolyqtyrý maqsatynda qosymsha 45 myń tonna kartop, 4 myń tonna qyryqqabat importtaldy.
