قاراعاندى وبلىسىندا كاسىپكەرلەرگە كارتوپتى تاۋارلىق بيرجا ارقىلى ساتپاعانى ءۇشىن 69 اكىمشىلىك قۇقىقبۇزۋشىلىق تۋرالى حاتتاما جاسالدى. بۇل تۋرالى باسەكەلەستىكتى قورعاۋ جانە دامىتۋ اگەنتتىگى مالىمدەدى، دەپ حابارلايدى Dalanews.kz.

اگەنتتىككە زاڭبۇزۋشىلىقتار تۋرالى اقپاراتتى وبلىستىق پروكۋراتۋرا ۇسىنعان. ايتا كەتەيىك، قازاقستاندا 2015 جىلدان باستاپ بەكىتىلگەن تاۋارلىق بيرجا ارقىلى ساتىلۋى ءتيىس ونىمدەر تىزىمىنە سالماعى 60 توننادان اساتىن جاڭا جانە سالقىنداتىلعان كارتوپ پارتيالارى كىرەدى.

2022–2024 جىلدار ارالىعىندا بيرجا تۋرالى زاڭنامانى بۇزعان 12 كاسىپكەرگە حاتتاما تولتىرىلعان. ولاردىڭ باسىم بولىگى زاڭ بۇزعانىن مويىنداپ، ايىپپۇل تولەۋگە كەلىسكەن. ءقازىردىڭ وزىندە مەملەكەت پايداسىنا 7،3 ملن تەڭگە ءوندىرىلدى.

“ءۇش كاسىپكەرگە قاتىستى جاسالعان 22 اكىمشىلىك ماتەريال سوتقا جولداندى. ولار ءوز قۇقىقتارىن پايدالانىپ، سوت تارتىبىمەن قاراۋ جونىندە ءوتىنىش بەرگەن”، – دەپ مالىمدەدى اگەنتتىك.

ايتا كەتەيىك، 2025 جىلدىڭ مامىرىندا الەۋمەتتىك ماڭىزى بار ازىق-تۇلىك تاۋارلارىنىڭ باعالارى ءارتۇرلى باعىتتا وزگەرىستەرگە ۇشىراعان ەدى.

ساۋدا جانە ينتەگراسيا مينيسترلىگىءنىڭ حابارلاۋىنشا، كەيبىر ازىق-تۇلىك تاۋارلارىنىڭ باعالارى ارزاندادى. مىسالى، 2025 جىلدىڭ 27 مامىرىنداعى دەرەكتەر بويىنشا الدىڭعى اپتامەن سالىستىرعاندا قىرىققابات 3،4%-عا، جۇمىرتقا 0،7%-عا، قاراقۇمىق، ماكارون جانە كۇنباعىس مايى 0،1-0،2%-عا ارزانداعان.

نان مەن كۇرىشتىڭ باعاسى تۇراقتى بولىپ، وزگەرىسسىز قالدى.

"سونىمەن بىرگە كەيبىر ونىمدەردىڭ باعاسى ءوستى. سوڭعى اپتادا ءسابىز 4،2%-عا، كارتوپ 2،8%-عا، پياز 2،5%-عا، تۇز 1،6%-عا، سۇزبە 0،8%-عا، ءسۇت پەن قانت 0،3%-عا، ماي، سيىر ەتى مەن تاۋىق ەتى 0،2%-عا، ۇن مەن ايران 0،1%-عا قىمباتتادى"، - دەپ جازىلعان حابارلامادا.

2025 جىلدىڭ باسىنان بەرى الەۋمەتتىك ماڭىزى بار ازىق-تۇلىك تاۋارلارى باعاسىنىڭ يندەكسى 6،8%-عا ءوستى.

باعالاردى تۇراقتاندىرۋ جانە ازىق-تۇلىك قاۋىپسىزدىگىن قامتاماسىز ەتۋ ءۇشىن جەدەل شارالار قابىلدانۋدا. اتاپ ايتقاندا، قىتايدان، پاكىستاننان جانە وزبەكستاننان ەرتە پىسەتىن كوكونىستەر جەتكىزۋ جۇمىسى ۇيىمداستىرىلدى. قازىرگى ۋاقىتتا استانادا مينيسترلىكتىڭ قولداۋىمەن "قتج ەكسپرەسس" اق جەتكىزگەن 50 رەفريجەراتور كونتەينەر كارتوپ تۇسىرىلۋدە. جالپى ىشكى نارىقتى ونىممەن تولىقتىرۋ ماقساتىندا قوسىمشا 45 مىڭ توننا كارتوپ، 4 مىڭ توننا قىرىققابات يمپورتتالدى.