«Aq jol» partiiasy aldaǵy Quryltai sailaýyna qatysýy múmkin, al partiia kásipkerlerdiń múddesin qorǵaýdy jalǵastyrady, dep habarlaidy Dala News.
Májilis depýtaty Azat Perýashev jýrnalisterdiń birqatar ótkir suraqtaryna jaýap berdi.
Onyń aitýynsha, partiia sailaýda árdaiym óz ornyn saqtap keledi jáne sailaýshylar aldyndaǵy bedeli joǵary.
«Bizdiń partiianyń beti taza, abyroiy taza. Biz óz mindetimizdi adal atqaryp kelemiz. Basqa partiialar dál osylai naqty kórsete ala ma – bul suraq», – dedi Perýashev.
Quryltai sailaýyna qatysty suraqqa ol partiianyń saiasi protsessterden tys qalmaitynyn meńzedi.
«Biz árqashan eldegi saiasi protsesterge qatysyp keldik. Qandai sailaý bolsa da, bizdiń partiia óz ustanymyn bildirip, qatysýǵa daiyn», – dedi ol.
Perýashevtyń sózinshe, «Aq jol» kásipkerlerdiń quqyqtaryn qorǵaý baǵytynan taimaidy.
«Bul bizdiń negizgi missiiamyz. Biz salyq, qarjy, bizneske qatysty barlyq bastamalardy muqiiat qaraimyz. Eger kásipkerlerge qysym bolsa, biz mindetti túrde qarsy shyǵamyz», – dedi depýtat.
Ol partiianyń naqty pozitsiia ustanatynyn atap ótti. Mysaly, Salyq kodeksine qatysty kúmándi normalarǵa qarsy bolǵanyn, sondai-aq Ulttyq bank usynǵan reiting agenttikteri týraly zań jobasyn qoldamaǵanyn eske saldy.
«Másele tek qarsy daýys berýde emes. Másele óz ustanymyńnyń bolýy jáne ony ashyq aitý», – dedi Perýashev.
Al jeke saiasi bolashaǵyna qatysty suraqqa ol naqty jaýap bermedi, biraq saiasatta belsendiligin jalǵastyrý nieti bar ekenin ańǵartty.
«Jumys bar jerde biz barmyz. Biz bastaǵan ister bar, olardy aiaqtaý kerek», – dedi ol.
