QMA Shymkent qalasy boiynsha departamenti intensivti alma baqtaryn qurý jáne damytýǵa arnalǵan memlekettik baǵdarlama aiasynda bólingen biýdjet qarajatyn jymqyrý deregi boiynsha tergeýdi aiaqtady, dep habarlaidy Dalanews.kz.
"Intensivti alma baqtaryn daiyn kúiinde tapsyrý" baǵdarlamasy sheńberinde jobalardy qarjylandyrý "Aýyl sharýashylyǵyn qarjylai qoldaý qory" AQ arqyly júzege asyrylǵan. Baǵdarlamanyń negizgi maqsaty daiyn infraqurylymy bar aýyl sharýashylyǵy jerlerin kásipkerlik sýbektilerine lizingke berý bolǵan.
Tergeý amaldaryna súiensek, qordyń burynǵy basqarma tóraǵasy J.D. Omarov bailanysy bar tulǵalar men baqylaýyndaǵy uiymdardy, sonyń ishinde Green Mart Kazakhstan JShS-ny tarta otyryp, memlekettik qarajatty jymqyrý shemasyn uiymdastyrǵan. Taýarlar men jumystardy satyp alý belgilengen rásimderdi buza otyryp, negizinen bir kózden alý tásilimen júrgizilgen. Jabdyqtardyń, materialdardyń jáne qurylys-montaj jumystarynyń quny jasandy túrde ósirilgen, al kózdelgen jumystardyń bir bóligi is júzinde oryndalmaǵan.
Soǵan qaramastan jalǵan qabyldaý-tapsyrý aktileri rásimdelip, solardyń negizinde biýdjet qarajaty aýdarylǵan. Saldarynan memleketke 430 mln teńgeden asa zalal kelgen.
Qosymsha agroónerkásipti memlekettik qoldaý sheńberinde bólingen investitsiialyq sýbsidiialardy zańsyz alý derekteri de anyqtaldy. Osy maqsatta aýyl sharýashylyǵy kooperativteri qurylyp, sýbsidiia alýǵa ótinishter berilgen.
Nátijesinde olardyń shottaryna jalpy somasy 327 mln teńgeden asa biýdjet qarajaty aýdarylǵan. Alaida kórsetilgen maqsattarǵa qarajattyń tek shamamen 20%-y jumsalyp, qalǵan bóligi, iaǵni 250 mln teńgeden asa qarjy senimdi adamdar arqyly qolma-qol aqshaǵa ainaldyrylyp, maqsatsyz paidalanylǵan.
Sot sanktsiiasymen jalpy aýdany 108 gektar bolatyn, quny 1 mlrd teńgeden asatyn jer ýchaskelerine tyiym salyndy. Kúdikti J.D. Omarov qamaýǵa alyndy. Qylmystyq is sotqa joldandy.
