قما شىمكەنت قالاسى بويىنشا دەپارتامەنتى ينتەنسيۆتى الما باقتارىن قۇرۋ جانە دامىتۋعا ارنالعان مەملەكەتتىك باعدارلاما اياسىندا بولىنگەن بيۋدجەت قاراجاتىن جىمقىرۋ دەرەگى بويىنشا تەرگەۋدى اياقتادى، دەپ حابارلايدى Dalanews.kz.
"ينتەنسيۆتى الما باقتارىن دايىن كۇيىندە تاپسىرۋ" باعدارلاماسى شەڭبەرىندە جوبالاردى قارجىلاندىرۋ "اۋىل شارۋاشىلىعىن قارجىلاي قولداۋ قورى" اق ارقىلى جۇزەگە اسىرىلعان. باعدارلامانىڭ نەگىزگى ماقساتى دايىن ينفراقۇرىلىمى بار اۋىل شارۋاشىلىعى جەرلەرىن كاسىپكەرلىك سۋبەكتىلەرىنە ليزينگكە بەرۋ بولعان.
تەرگەۋ امالدارىنا سۇيەنسەك، قوردىڭ بۇرىنعى باسقارما ءتوراعاسى ج.د. وماروۆ بايلانىسى بار تۇلعالار مەن باقىلاۋىنداعى ۇيىمداردى، سونىڭ ىشىندە Green Mart Kazakhstan جشس-نى تارتا وتىرىپ، مەملەكەتتىك قاراجاتتى جىمقىرۋ سحەماسىن ۇيىمداستىرعان. تاۋارلار مەن جۇمىستاردى ساتىپ الۋ بەلگىلەنگەن راسىمدەردى بۇزا وتىرىپ، نەگىزىنەن ءبىر كوزدەن الۋ تاسىلىمەن جۇرگىزىلگەن. جابدىقتاردىڭ، ماتەريالداردىڭ جانە قۇرىلىس-مونتاج جۇمىستارىنىڭ قۇنى جاساندى تۇردە وسىرىلگەن، ال كوزدەلگەن جۇمىستاردىڭ ءبىر بولىگى ءىس جۇزىندە ورىندالماعان.
سوعان قاراماستان جالعان قابىلداۋ-تاپسىرۋ اكتىلەرى راسىمدەلىپ، سولاردىڭ نەگىزىندە بيۋدجەت قاراجاتى اۋدارىلعان. سالدارىنان مەملەكەتكە 430 ملن تەڭگەدەن اسا زالال كەلگەن.
قوسىمشا اگروونەركاسىپتى مەملەكەتتىك قولداۋ شەڭبەرىندە بولىنگەن ينۆەستيسيالىق سۋبسيديالاردى زاڭسىز الۋ دەرەكتەرى دە انىقتالدى. وسى ماقساتتا اۋىل شارۋاشىلىعى كووپەراتيۆتەرى قۇرىلىپ، سۋبسيديا الۋعا وتىنىشتەر بەرىلگەن.
ناتيجەسىندە ولاردىڭ شوتتارىنا جالپى سوماسى 327 ملن تەڭگەدەن اسا بيۋدجەت قاراجاتى اۋدارىلعان. الايدا كورسەتىلگەن ماقساتتارعا قاراجاتتىڭ تەك شامامەن 20%-ى جۇمسالىپ، قالعان بولىگى، ياعني 250 ملن تەڭگەدەن اسا قارجى سەنىمدى ادامدار ارقىلى قولما-قول اقشاعا اينالدىرىلىپ، ماقساتسىز پايدالانىلعان.
سوت سانكسياسىمەن جالپى اۋدانى 108 گەكتار بولاتىن، قۇنى 1 ملرد تەڭگەدەن اساتىن جەر ۋچاسكەلەرىنە تىيىم سالىندى. كۇدىكتى ج.د. وماروۆ قاماۋعا الىندى. قىلمىستىق ءىس سوتقا جولداندى.
