Qazaqstanda eń tómengi jalaqyny kúrt arttyrý múmkin emes, dep habarlaidy Dala News.
Depýtat Aitýar Qoshmambetov málimdeýinshe, eń tómengi jalaqyny esepteýdiń ózindik halyqaralyq ádistemesi bar jáne ol álem elderinde keńinen qoldanylady.
Onyń aitýynsha, qazirgi tańda eń tómengi jalaqyny mediandyq jalaqynyń 50%-yna teńestirý – damyǵan elderdegi qalyptasqan standart, sondyqtan Qazaqstan da osy baǵytqa umtylýy qajet.
«Qazir eń tómengi jalaqy belgili bir ádistemege sáikes esepteledi, bul – búkil álemde qoldanylatyn tásil. Mediandyq jalaqynyń 50%-y degen – eń damyǵan elderdiń standarty. Biz de soǵan umtylýymyz kerek. Biraq bir jyl ishinde eń tómengi jalaqyny 12 ese kóterý múmkin emes. Óitkeni bizdiń ekonomikamyz ondai deńgeide ósken joq. Eger ekonomika eki ese ósse, onda mundai sheshimderdi qarastyrýǵa bolar edi. Biraq qazirgi jaǵdaida ondai múmkindik joq», – dedi Qoshmambetov.
Depýtattyń pikirinshe, jalaqy ósimi ekonomikadaǵy naqty kórsetkishterge sáikes kezeń-kezeńimen júzege asyrylýy tiis.
«Jalaqyny birden birneshe ese kóterý emes, ony ekonomikamen birge birtindep ósirý qajet. Mysaly, ekonomikamyz 6,5%-ǵa ósse, jalaqy da sol shamada ósýi oryndy. Bul – turaqty ári teńgerimdi tásil», – dep atap ótti ol.
Onyń sózinshe, kásipkerlerdiń tabysy men ainalymy aitarlyqtai artpaiynsha, jalaqyny kúrt kóterý bizneske de, ekonomikaǵa da qosymsha salmaq túsirýi múmkin.
