Otbasy bankiniń («Báiterek» holdinginiń enshiles uiymy) jańa bilim berý jobasynyń beinerolikteri qazaqstandyqtar úshin qoljetimdi boldy. Olardy banktiń YouTube-arnasynan tabýǵa bolady: Oqytý beinerolikterinde mamandar qarapaiym jáne túsinikti tilde bilim alýǵa jáne óz baspanasyn satyp alýǵa tiimdi jinaqtaýǵa kómektesetin qarjylyq quraldar týraly aityp beredi, dep habarlaidy dalanews.kz.
Materialdardy kez kelgen jerde: úide, takside nemese jeke avtokólikte, serýendeýde ózińizge yńǵaily ýaqytta jáne qolaily qarqynmen kórýge jáne tyńdaýǵa bolady. «Ipoteka akademiiasynyń» mindeti — qazaqstandyqtardyń qarjylyq saýattylyǵyn arttyrý, olardyń salmaqty qarjylyq sheshimder qabyldaýyna kómektesý. Resmi derekkózden alynǵan senimdi aqparat Otbasy bankiniń ónimderin jaqsyraq túsinýge, óz is-áreketterińizdi derbes josparlaýǵa jáne syrtqy deldaldardyń kómeginsiz áreket etýge múmkindik beredi.
Mysaly, «Ipoteka akademiiasynyń» sońǵy shyǵarylymynda salymshy Otbasy bankindegi depozitte qarajat jinap jatqan kezde, «Maqsat» jáne «Sandyq» erte brondaý baǵdarlamalary arqyly ózine unaǵan páterdiń baǵasyn qalai «muzdatyp» qoiýǵa bolatyny týraly aityldy.
«Maqsat» mehanizmi klientke qurylys kezeńinde páterdi tirkelgen quny boiynsha brondaý múmkindigin beredi. Klient bankte qaryz boiynsha maquldaý alyp, páterdi tańdaidy jáne brondaidy. Sodan keiin depozit ashyp, belgilengen merzimde (14 aiǵa deiin) oǵan qaryz somasynyń 20%-dan 50%-ǵa deiingi mólsherinde alǵashqy jarnany jinaqtaidy. Qajetti soma jinalǵan kezde páterdi satyp alýǵa bolady.
«Sandyq» mehanizmi kóbinese daiyn turǵyn úidi satýǵa baǵyttalǵan. Onyń kómegimen klient aralyq qaryz alý úshin qoiylatyn talaptardy áli oryndamaǵan bolsa da, páter satyp ala alady. Mysaly, eger onyń Otbasy bankindegi depozitinde qaryz somasynyń 50%-y jinaqtalyp úlgerse, biraq baǵalaý kórsetkishi (BK) áli eń tómengi 5 mánine jetpese. Bul jaǵdaida salymshy báribir ózine unaǵan páterdi tirkelgen baǵamen brondai alady. Aralyq qaryz boiynsha barlyq sharttar oryndalǵanǵa deiin páter ony kútip turady.
Iaǵni, «Maqsat» pen «Sandyq» mehanizmderiniń negizgi artyqshylyǵy — klient aldymen páterdi tańdaidy, qunyn bekitedi, turǵyn úidi brondaidy, sodan keiin baryp banktiń standartty sharttaryn oryndaidy: qarajat jinaqtaidy jáne baǵalaý kórsetkishiniń eń tómengi mánine qol jetkizedi.
Qurylys salýshylar úshin «Sandyq» jáne «Maqsat» mehanizmderi turǵyn úidiń satylýyn tezdetýge, satylmaǵan páterler kólemin azaitýǵa jáne kóbirek áleýetti satyp alýshylardy tartýǵa múmkindik beredi. Osy mehanizmder aiasynda Otbasy bankimen jumys isteý úshin tiisti kelisimshart jasasý qajet.
Eki mehanizm de tájiribede qoldanylyp jatyr. Sondyqtan páter tańdamas buryn, klientterge qurylys salýshydan onyń «Sandyq» nemese «Maqsat» aiasynda Otbasy bankimen jumys isteitinin naqtylap alý usynylady.
Sonymen qatar «Ipoteka akademiiasynyń» jańa shyǵarylymdarynan «Ulttyq qor — balalarǵa» baǵdarlamasy boiynsha eseptelgen qarajatty qaida jumsaýǵa bolatynyn bilýge bolady, «AQYL» depoziti arqyly bilim alýǵa aqsha jinaýdyń nelikten tiimdirek ekeni túsindiriledi, «Umai» baǵdarlamasynyń artyqshylyqtary nede ekeni jáne «Naýryz» baǵdarlamasyna qatysý kezinde Otbasy bankindegi depozittegi jinaqtardyń nelikten sonshalyqty mańyzdy ekeni aitylady.
Biyl Otbasy banki barlyǵy 10 aqparattyq beinerolik shyǵarady. Barlyq materialdar banktiń YouTube-arnasynda ornalastyrylady jáne kez kelgen adamǵa múldem tegin qoljetimdi.
«Ipoteka akademiiasy» jobasy 2023 jyly bastalǵan bolatyn jáne osy ýaqyt ishinde qazaqstandyqtar úshin suranysqa ie aqparat kózine ainaldy. Qazaq jáne orys tilderinde barlyǵy 70 beinerolik jaryq kórdi. Bul materialdardy shamamen 1,5 million adam kórip, zerttep úlgerdi.
Bank qarjylyq quraldardy qarapaiym tilmen túsindire otyryp, adamdarǵa óz múmkindikterin durys esepteýge, qaryz alý sharttaryn aldyn ala baǵalaýǵa jáne derbes túrde salmaqty sheshimder qabyldaýǵa kómektesedi. Mundai bilim qazaqstandyqtarǵa otbasylyq biýdjetti senimdirek josparlaýǵa jáne turǵyn úi máselesin deldaldarsyz sheshýge múmkindik beredi.
Eń mańyzdysy, «Ipoteka akademiiasynyń» jańa shyǵarylymdary endi sýrdoaýdarmamen súiemeldenedi. Bul paidaly aqparattyń keńirek aýditoriiaǵa, sonyń ishinde estý qabileti buzylǵan qazaqstandyqtarǵa da qoljetimdi bolýyna jasalǵan mańyzdy qadam. Sýrdoaýdarma kórermenderge beinerolikterdiń mazmunyn tolyq qabyldaýǵa, turǵyn úi baǵdarlamalarynyń sharttaryn túsinýge, qarjylyq terminderdi uǵynýǵa jáne úshinshi tulǵalardan qosymsha túsinikteme suramai-aq aqparat alýǵa kómektesedi.
