Qazaqstan Respýblikasynyń Týrizm jáne sport ministrligi «sportshy-nusqaýshy» laýazymyna qoiylatyn mindetti biliktilik talaptarynyń qataryna orta bilimniń bolýyn engizdi. Tiisti ózgerister Joǵary aýditorlyq palatanyń nusqamasy boiynsha engizildi, dep habarlaidy dalanews.kz.
Buǵan deiin Joǵary aýditorlyq palata sportshylardy tárbieleý men daiarlaýǵa, onyń ishinde joǵary jetistikter sportyn damytýǵa bólingen biýdjet qarajatynyń paidalanylý tiimdiligine memlekettik aýdit júrgizdi.
Aýdit qorytyndysy boiynsha Ministrlikke «sportshy-nusqaýshy» laýazymyna qoiylatyn biliktilik talaptaryn tómendetý usynyldy. Atap aitqanda, kadrlardy daiarlaý baǵytynda «Dene shynyqtyrý jáne sport» mamandyǵy boiynsha joǵary (nemese joǵary oqýornynan keiingi) bilimniń ne «Dene shynyqtyrý jáne sport» mamandyǵy boiynsha tehnikalyq jáne kásiptik, orta bilimnen keiingi bilimniń ne sport túri (túrleri) boiynsha Qazaqstan Respýblikasynyń ulttyq qurama komandasynyń quramyna qabyldanǵan jaǵdaida jalpy orta bilimniń bolýyna qatysty talaptardy tómendetý usynyldy.
Atalǵan talaptar kolledjderde oqýyn jalǵastyryp júrgen, aiaqtalǵan kásibi bilimi nemese jalpy orta bilimi (11 synyp) týraly qujaty joq, halyqaralyq jarystarda el namysyn qorǵap júrgen jas sportshylardy «sportshy-nusqaýshy» laýazymyna qabyldaýǵa jáne olardyń eńbegine aqy tóleýge múmkindik bermedi. Sonyń saldarynan jas sportshylardyń sporttyq mansabyn bilim alýmen qatar alyp júrýine jetkilikti yntalandyrý bolmady.
Bul rette kórkem gimnastika, sinhrondy júzý jáne mánerlep syrǵanaý siiaqty sport túrlerinde Olimpiada oiyndaryna jáne eresekter arasyndaǵy basqa da halyqaralyq jarystarǵa 16 jastan bastap, al boks, júzý jáne sýǵa sekirý siiaqty sport túrlerine
19 jastan bastap qatysýǵa ruqsat etiledi.
Nátijesinde úlgilik biliktilik sipattamalaryna qajetti ózgerister engizildi. Endi sportshy-nusqaýshy laýazymyna úmitkerdiń keminde orta bilimi bolýǵa tiis.
Qabyldanǵan shara biýdjet qarajaty esebinen eńbek etetin sportshylar úshin bazalyq bilim standartyn bekitip, olardyń jattyǵýlar men jarystarǵa qatysýmen qatar oqýyn jalǵastyrýyna yntalandyrady. Sonymen qatar bul qadam úlken sporttan keiingi ómirge daiyndalýǵa, atap aitqanda, joǵary oqý ornyna túsýge, jattyqtyrýshylyq qyzmetke aýysýǵa nemese basqa mamandyqtardy igerýge negiz qalaidy.
Memlekettik aýdit qorytyndysy boiynsha berilgen basqa da tapsyrmalar men usynymdardyń oryndalýy Joǵary aýditorlyq palatanyń baqylaýynda.
