Petropavlda qalanyń nóser kárizinen jinalǵan sýdy tazartýmen ainalysatyn kommýnaldyq kásiporyn Esil ózenine aǵyn sýdy zańsyz tókken. Kompaniiaǵa 174 million teńge aiyppul salyndy, dep habarlaidy dalanews.kz KTK telearnasyna silteme jasap.
Tabiǵatty qorǵaý prokýratýrasynyń málimetinshe, kásiporyn byltyr jyl sońynda bir aiǵa jýyq ýaqyt boiy ózenge aǵyn sý jibergen. Bul jaǵdai qysta bolǵanymen, zań boiynsha mundai sýdy tek jyldyń jyly mezgilinde aǵyzýǵa ruqsat etiledi.
Ekologter júrgizgen tekserý barysynda aǵyn sý quramyndaǵy 16 kórsetkishtiń ruqsat etilgen shekten asyp ketkeni anyqtaldy. Olardyń qatarynda nitritter, nitrattar, sýlfattar men munai ónimderi bar.
Sotta kásiporyn ókili bul qadamǵa májbúrli túrde barǵanyn aitqan. Onyń túsindirýinshe, qys boiy sý burý júiesiniń jumysyn toqtatý múmkin bolmaǵan.
"Kommýnaldyq kásiporyn aýmaǵyna ornatylǵan shyǵyn ólshegish quraldardyń kórsetkishine sáikes, qys mezgilinde jalpy kólemi 3,5 myń tekshe metrden asatyn aǵyn sý tógilgen. Sot aktisi zańdy kúshine endi, qazir aiyppuldy óndirip alý jumystary júrgizilip jatyr", – dedi Soltústik Qazaqstan oblysy mamandandyrylǵan tabiǵatty qorǵaý prokýratýrasynyń prokýrory Erulan Bimendin.
