قازاقستاندا ەڭ تومەنگى جالاقىنى كۇرت ارتتىرۋ مۇمكىن ەمەس، دەپ حابارلايدى Dala News.

دەپۋتات ايتۋار قوشمامبەتوۆ مالىمدەۋىنشە، ەڭ تومەنگى جالاقىنى ەسەپتەۋدىڭ وزىندىك حالىقارالىق ادىستەمەسى بار جانە ول الەم ەلدەرىندە كەڭىنەن قولدانىلادى.

ونىڭ ايتۋىنشا، قازىرگى تاڭدا ەڭ تومەنگى جالاقىنى مەدياندىق جالاقىنىڭ 50%-ىنا تەڭەستىرۋ – دامىعان ەلدەردەگى قالىپتاسقان ستاندارت، سوندىقتان قازاقستان دا وسى باعىتقا ۇمتىلۋى قاجەت.

«ءقازىر ەڭ تومەنگى جالاقى بەلگىلى ءبىر ادىستەمەگە سايكەس ەسەپتەلەدى، بۇل – بۇكىل الەمدە قولدانىلاتىن ءتاسىل. مەدياندىق جالاقىنىڭ 50%-ى دەگەن – ەڭ دامىعان ەلدەردىڭ ستاندارتى. ءبىز دە سوعان ۇمتىلۋىمىز كەرەك. ءبىراق ءبىر جىل ىشىندە ەڭ تومەنگى جالاقىنى 12 ەسە كوتەرۋ مۇمكىن ەمەس. ويتكەنى ءبىزدىڭ ەكونوميكامىز ونداي دەڭگەيدە وسكەن جوق. ەگەر ەكونوميكا ەكى ەسە وسسە، وندا مۇنداي شەشىمدەردى قاراستىرۋعا بولار ەدى. ءبىراق قازىرگى جاعدايدا ونداي مۇمكىندىك جوق»، – دەدى قوشمامبەتوۆ.

دەپۋتاتتىڭ پىكىرىنشە، جالاقى ءوسىمى ەكونوميكاداعى ناقتى كورسەتكىشتەرگە سايكەس كەزەڭ-كەزەڭىمەن جۇزەگە اسىرىلۋى ءتيىس.

«جالاقىنى بىردەن بىرنەشە ەسە كوتەرۋ ەمەس، ونى ەكونوميكامەن بىرگە بىرتىندەپ ءوسىرۋ قاجەت. مىسالى، ەكونوميكامىز 6،5%-عا وسسە، جالاقى دا سول شامادا ءوسۋى ورىندى. بۇل – تۇراقتى ءارى تەڭگەرىمدى ءتاسىل»، – دەپ اتاپ ءوتتى ول.

ونىڭ سوزىنشە، كاسىپكەرلەردىڭ تابىسى مەن اينالىمى ايتارلىقتاي ارتپايىنشا، جالاقىنى كۇرت كوتەرۋ بيزنەسكە دە، ەكونوميكاعا دا قوسىمشا سالماق ءتۇسىرۋى مۇمكىن.