QR Ulttyq banktiń tóraǵasy Timýr Súleimenov "teńgeniń dollarǵa shaqqandaǵy shegendelgen baǵamyn (naryq emes, Úkimettiń ózi belgileitin baǵamy) elimizdiń qazirgi ekonomikalyq jaǵdaiynda nege iske asyrmasqa" degen saýalǵa jaýap berdi, dep habarlaidy Dalanews.kz.
"Qazaqstanda 2015 jylǵa deiin bolǵan shegendelgen baǵam bizdiń qazirgi ekonomikalyq modelimizge sáikes kelmeidi", — dedi Timýr Súleimenov Senattyń jalpy otyrysynda.
Ulttyq bank basshysy ekonomikanyń munai tabysyna táýeldiligi men onyń baǵamyndaǵy aýytqý teńgerimsizdik jaǵdaiyn týdyratynyn, sol sebepti shegendelgen baǵamdy qoldap, ustap turý úshin aitarlyqtai shyǵyn shyǵarýǵa týra keletinin aitady.
"2014-2015 jyldary biz osyndai teńgerimsizdikten qordalanǵan máselemen betpe-bet keldik. Sol kezde memleket kýrsty ustap turý úshin 30 milliard dollardan astam qarajat jumsady, biraq aqyrynda odan da paida bolmady, teńge devalvatsiiaǵa ushyrady. Sol kezde-aq shegendelgen baǵam makroekonomikalyq nemese naryqtyq jaǵdaiǵa sai kelmeitinin moiyndaǵan bolatynbyz", - dedi ol.
"Valiýta baǵamy shegendelip, bekitilgende ekonomikadaǵy ózgeristerge qaramastan, osy baǵamdy myqtap ustap turý mindeti týyndaidy. Ainalyp kelgende, bul adamdar men kompaniialardyń óz jinaqtaryn teńgede emes, dollarda saqtaýyna túrtki bolady. Nátijesinde depozitter men kreditter de dollardai esepke kóshedi, ekonomika Úkimettiń nemese Ulttyq banktiń sheshimderine emes, dollarǵa qarap baǵdar ustaidy", - dep esepteidi ol.
"Sen óz valiýtańdy dollarǵa bailap qoisańyz, onda ózindegi sheshimderge qarailaýdyń ne keregi bar, báribir dollar baǵamyn ustanýǵa mindetti bolsańyz",- dep nyǵyrlai tústi shegendelgen baǵamnyń Qazaqstanǵa kerek joqtyǵyn túsindirgen ol.
"Ózgermeli kýrs toqty turaqtandyratyn avtomat sekildi. Solai áreket etedi. Ekonomika ósimi bolǵanda baǵam nyǵaiady, al tólem balansy álsiregen kezde — baǵam tómendeidi. Osy jaǵynan alǵanda, aǵymdaǵy aqsha baǵamyn qalyptastyrý rejimi bizdiń makroekonomikalyq modelimizge sai jáne bolashaqta da oǵan arqa súiei beremiz dep oilaimyn", dep sózin túiindedi ol.
