İle Alataýy memlekettik ulttyq tabıǵı parkiniń 30 jyldyǵyna oraı, parktiń aýmaǵynda jańa «Butaqty» vızıt-ortalyǵynyń saltanatty ashylýy ótti, dep habarlaıdy Dalanews.kz

Joba turaqty týrızmdi damytý jáne týrısik ınfraqurylymdy jańǵyrtý aıasynda «Týranga Grýpp» kompanıasy men «İle Alataýy» ulttyq parkiniń seriktestigimen júzege asyrylǵan. Jobany iske asyrý barysynda Almaty qalasy ákimdigi tarapynan ınjenerlik ınfraqurylymǵa qoldaý kórsetilgen.

Vızıt-ortalyqtyń ashylý rásimine Orman sharýashylyǵy jáne janýarlar dúnıesi komıtetiniń tóraǵasy Danıar Turǵambaev qatysty.

Keshen eki bólikten turady: negizgi vızıt-ortalyq jáne «Butaqty» atty kafe. Kafe jobanyń seriktesi – kásipker ári ekoaktıvıst Sergeı Spısynnyń basqarýynda.

Ortalyqta kelýshiler úshin birqatar zamanaýı múmkindikter qarastyrylǵan:
zamanaýı sanıtarlyq toraptar, tamaqtaný aımaǵy, tımbıldıng jáne sheberlik sabaqtaryna arnalǵan alańdar, ashyq aýada bilim berý jáne mádenı baǵdarlamalar, sondaı-aq ulttyq parkke arnalǵan sývenırlik ónimder men brendtelgen taýarlar usynylady.

Joba aıasynda QazaqNationalParks brendimen jumys isteıtin 6 vızıt-ortalyq qyzmet etedi. Investorlardyń jalpy salymy 8,5 mlrd teńgeni qurap, 200-ge jýyq turaqty jumys orny ashylǵan. Onyń ishinde «Butaqty» ortalyǵynda 20 jańa jumys orny qurylǵan.

Sońǵy jyldary vızıt-ortalyqtardyń ashylýy ulttyq parkterge kelýshiler sanynyń aıtarlyqtaı ósýine áser etti. Mysaly, İle Alataýy ulttyq parkinde kelýshiler sany 2019 jylǵy 300 myńnan 2025 jyly 950 myńǵa deıin artqan. Al Sharyn ulttyq parkinde bul kórsetkish 5 esege ósken.

Aldaǵy ýaqytta Úlken Almaty kóli aýmaǵynda jańa vızıt-ortalyq salý josparlanyp otyr. Jobanyń sáýletshisi – shotlandıalyq maman Rıkardo Marını.

Jalpy, mundaı jobalar ekologıalyq týrızmdi damytýǵa, tabıǵatty qorǵaý mádenıetin qalyptastyrýǵa jáne halyqqa qoljetimdi demalys ınfraqurylymyn jasaýǵa baǵyttalǵan.