Elimizde turǵyn úi-kommýnaldyq sharýashylyǵyn jańǵyrtý aiasynda 19 myń shaqyrymnan astam injenerlik jeli jóndeldi, dep habarlaidy DalaNews.
Bul týraly Astanada ótken dóńgelek ústelde Tabiǵi monopoliialardy retteý komitetiniń tóraǵasy Timýr Kosymbaev málimdedi. Onyń aitýynsha, kommýnaldyq infraqurylymnyń tozýy uzaq jyldar boiy ózekti másele bolyp kelgen.
«2023 jyldan bastap injenerlik infraqurylymdy aýqymdy jańǵyrtý bastaldy. Jelilerdi jóndeý kólemi 2022 jylmen salystyrǵanda eki esege artty. Qazir naqty nátije bar — tozý deńgeii tómendep, qyzmetterdiń senimdiligi artty», – dedi ol.
2025 jyldan beri «Energetikalyq jáne kommýnaldyq sektorlardy jańǵyrtý» ulttyq jobasy júzege asyrylýda. Onyń aiasynda 31,6 mlrd teńgege 17 pilottyq joba qarjylandyrylyp, sonyń altaýy aiaqtalǵan.
Jańǵyrtý jumystary óńirlerde de nátijesin kórsetýde. Shymkent pen Túrkistan oblysynda 104 shaqyrym elektr jelisi jańartyldy. Taiynsha men Temirtaýda jylý jelileri jóndeldi. Al Jetisý oblysynda 6,4 myń tutynýshy úshin elektr energiiasyn óndirý kólemi artty.
Komitet málimetinshe, segiz kásiporyn qaýipti tozý deńgeiinen shyǵarylǵan. Bul saladaǵy júieli jańǵyrtý jumystarynyń tiimdiligin kórsetedi.
Aldaǵy ýaqytta bul jumystar jalǵasady. 2026 jyly taǵy 7,6 myń shaqyrym injenerlik jelini jóndeý josparlanyp otyr.
