ەلىمىزدە تۇرعىن ۇي-كوممۋنالدىق شارۋاشىلىعىن جاڭعىرتۋ اياسىندا 19 مىڭ شاقىرىمنان استام ينجەنەرلىك جەلى جوندەلدى، دەپ حابارلايدى DalaNews.
بۇل تۋرالى استانادا وتكەن دوڭگەلەك ۇستەلدە تابيعي مونوپوليالاردى رەتتەۋ كوميتەتىنىڭ ءتوراعاسى تيمۋر كوسىمبايەۆ مالىمدەدى. ونىڭ ايتۋىنشا، كوممۋنالدىق ينفراقۇرىلىمنىڭ توزۋى ۇزاق جىلدار بويى وزەكتى ماسەلە بولىپ كەلگەن.
«2023 جىلدان باستاپ ينجەنەرلىك ينفراقۇرىلىمدى اۋقىمدى جاڭعىرتۋ باستالدى. جەلىلەردى جوندەۋ كولەمى 2022 جىلمەن سالىستىرعاندا ەكى ەسەگە ارتتى. ءقازىر ناقتى ناتيجە بار — توزۋ دەڭگەيى تومەندەپ، قىزمەتتەردىڭ سەنىمدىلىگى ارتتى»، – دەدى ول.
2025 جىلدان بەرى «ەنەرگەتيكالىق جانە كوممۋنالدىق سەكتورلاردى جاڭعىرتۋ» ۇلتتىق جوباسى جۇزەگە اسىرىلۋدا. ونىڭ اياسىندا 31،6 ملرد تەڭگەگە 17 پيلوتتىق جوبا قارجىلاندىرىلىپ، سونىڭ التاۋى اياقتالعان.
جاڭعىرتۋ جۇمىستارى وڭىرلەردە دە ناتيجەسىن كورسەتۋدە. شىمكەنت پەن تۇركىستان وبلىسىندا 104 شاقىرىم ەلەكتر جەلىسى جاڭارتىلدى. تايىنشا مەن تەمىرتاۋدا جىلۋ جەلىلەرى جوندەلدى. ال جەتىسۋ وبلىسىندا 6،4 مىڭ تۇتىنۋشى ءۇشىن ەلەكتر ەنەرگياسىن ءوندىرۋ كولەمى ارتتى.
كوميتەت مالىمەتىنشە، سەگىز كاسىپورىن ءقاۋىپتى توزۋ دەڭگەيىنەن شىعارىلعان. بۇل سالاداعى جۇيەلى جاڭعىرتۋ جۇمىستارىنىڭ تيىمدىلىگىن كورسەتەدى.
الداعى ۋاقىتتا بۇل جۇمىستار جالعاسادى. 2026 جىلى تاعى 7،6 مىڭ شاقىرىم ينجەنەرلىك جەلىنى جوندەۋ جوسپارلانىپ وتىر.
