Zań jáne tártip: óńirde quqyqtyq keńes berý boiynsha keń kólemdi aktsiia ótti
Aqtóbe qalasynda jáne oblys aýdandarynda aýqymdy «Quqyqtyq dárihana» aktsiiasy ótti. Aqtóbe qalasyndaǵy «Keruen City» oiyn-saýyq ortalyǵynda ótken negizgi is-sharaǵa oblystyq prokýratýranyń, quqyq qorǵaý jáne memlekettik organdardyń ókilderi, zańgerler men advokattar qatysty.
Aktsiianyń maqsaty – halyqtyń quqyqtyq saýattylyǵyn arttyrý, azamattarǵa tegin zań kómegin kórsetý, problemalyq máselelerdi jedel ári bilikti túrde sheshýge yqpal etý, sondai-aq «Zań men tártip» qaǵidatyn keńinen nasihattaý.
Sharaǵa kelgen aqtóbelikterdiń qatary kóp boldy. Turǵyndar aliment, nesie bereshekteri, alaiaqtyq, ásirese internet-alaiaqtyqqa qatysty túrli suraqtarymen júgindi.
«Zań aiasynda túsindirme jumystary júrgizilýde. Azamattar óz saýaldaryna tolyqqandy jaýap alyp jatyr, qajet bolǵan jaǵdaida sotqa aryz qurastyrýda járdem beremiz. Onyń jobasyn daiyndaýǵa kómektesemiz» - dedi oblystyq prokýratýranyń apparat basshysy Ashat Bekmuhanov.
Azamattarǵa qolaily jaǵdai jasaý maqsatynda jumys úsh baǵytta uiymdastyryldy: quqyq qorǵaý blogynda qylmystyq jáne ákimshilik zańnama boiynsha keńes berilse, memlekettik organdar áleýmettik, jer jáne turǵyn úi quqyqtaryn túsindirdi, al saraptamalyq blok aiasynda zańgerler, notariýstar men sot oryndaýshylary kásibi keńester usyndy.
