KazTAG agenttiginiń bas direktory Aset Mataev tergeý izoliatorynda karantinge ornalastyryldy, dep habarlaidy Dala News.
Bul týraly onyń advokaty Rena Kerimova málimdedi. Onyń aitýynsha, Mataevtyń jaǵdaiy aýyr: mańdaiynda úlken tigis, kózi isip, betiniń bir bóligi kógergen.
«Ol jańa kelgendermen birge 15 kúndik karantinde otyr», – dedi Kerimova.
Advokat Saýle Kobjanova mundai jaǵdaida qoldanylǵan bultartpaý sharasyn orynsyz ári shamadan tys dep baǵalady. Onyń pikirinshe, Mataevqa meditsinalyq kómek qajet, alaida ol tiisti jaǵdai jasalmaǵan kamerada otyr.
Eske salaiyq, Aset Mataevtyń ustalǵany 18 naýryzda belgili boldy. Resmi málimetke sáikes, Almatynyń Medeý aýdanynda janjal shyǵyp, ol tóbeleske ulasqan.
Advokattyń aitýynsha, bul jaǵdai aldyn ala uiymdastyrylǵan arandatý bolýy múmkin. Ol belgisiz adamdar Mataevqa shabýyl jasap, basyna aýyr jaraqat salǵanyn málimdedi.
Osy oqiǵaǵa bailanysty «Ádil sóz» qory jan-jaqty tergeý júrgizýdi talap etti.
Aset Mataev pen KazTAG bas redaktory Amir Kasenov Freedom Finance kompaniiasynyń shaǵymy boiynsha qozǵalǵan is aiasynda kúdikke ilingen. Olarǵa «jalǵan aqparat taratý» baby boiynsha aiyp taǵylǵan.
Redaktsiia óz kezeginde jariialanǵan materialdar oqyrmandardyń shaǵymdaryna negizdelgenin jáne jalǵan aqparat joq ekenin málimdedi.
